Dawa synjuk waheh shnong ban pynbeit iaka rukom ot surok ba iaid lyngba Dawki PHC

Syllad | The Rising MeghalayaSeptember 9, 2020

Ka Synjuk Waheh Shnong War Jaintia Amlarem ka la pyrshah jur iaka jingthmu jong ka sorkar Jylla ban pynheh bad siang surok lyngba ka Dawki PHC kaba don hapoh ka shnong Bakur Dawki West Jaintia Hills District.

Kane ka surok ka dei kaba la bei pisa da ka Japanese International Corporation Agency (JICA) haduh 1377.5 crore kaba kynthup iaka bai musur jaka ban shna iaka surok naduh Shillong-Dawki.

U Bah Daniel Khongsit Waheh Shnong Bakur uba dei ruh u President ka Synjuk ki Waheh Shnong War Jaintia ula iathuh ba la don 27 tylli ki Shnong kiba hap hapoh ka jingpeit bad ai jingsumar jong kane ka PHC kumjuh ki shnong kiba don sha shilliang ka wah Umngot kiba hap sha East Khasi Hills.

“Ngi pyrshah iaka company bad iaka sorkar Jylla kaba thmu ban shna ia ka surok thymmai kaba iaid lyngba ka PHC. Ngi dawa ba dei ban pynsangeh noh shwa ban pyniaid iaka surok lyngba ka PHC Dawki bad ban thew biang iaka rukom ot iaka surok ne ka Alignment thymmai iaka surok namar ka lad ka don ban pynkynriah iaka surok ban lait shah ktah ka PHC,” la ong u Daniel Khongsit.

Ula ong ka synjuk ka ieng haka nongrim ban nym ai lad ban pynduh pyndam iaka PHC namar kumba ka long mynta shitom bha ban ioh jaka ban shna Hospital sha wei pat.

Ka jingdon kane ka PHC hapoh ka shnong Bakur Dawki namar ba kadei ka jaka iew bad ka jaka ba mar khap bad ka East Khasi Hills bad kumjuh ka khappud bad ka Bangladesh ka ai jingmyntoi shibun iaki paidbah, kumta ka sorkar kadei ban shim khia ban pynbeit ia kane ka jingeh u paidbah ka thain, ong ka Synjuk Waheh Shnong War Jaintia.