Dawa thung nonghikai ka KSU ha Rymbai GSS bad pyntreikam ia ka Residential School, Training Institute

Syllad | The Rising MeghalayaOctober 14, 2023

Ka Khasi Students’ Union (KSU) East Jaintia Hills District Unit lyngba ka Education Cell ha ka 13 tarik Risaw ka la leit ban iakynduh ia ki director jong ka DSEL & DERT u Swapnil Tembe (IAS) bad ka Kong RS Manner halor ka jingbym don nonghikai Science ha Rymbai  Govt Secondary School  bad ka jingbym pyntreikam ia artylli ki jaka pule kiba don ha Byndihati, kata ka Residential School bad Block Teachers Training Institute.

Kane ka jingleit jurip jong ka Seng sha katei ka skul ka la wan long hadien ba ka la ioh pdiang ia ka jingujor na ki paidbah halor ka jingbym don nonghikai Science ha Rymbai Govt Secondary School mynta la kumba shi snem ei ei, bad ka seng ka la lap ruh ba kane ka skul ka la khapngiah ki kamra klas namar bym biang ka iingskul bad kiwei kiwei de ki jingdonkam kum ka Science Laboratory, Computers bad ki nonghikai ba pura namar bun ki nonghikai ki dei kiba shu wan hikai shipor ne officiate.

Ka Seng lyngba ka Education Cell ba la ialam da u Samla San Tomba Bamon Asst Education Secretary ki la ai jingmut ia U Director ban dei ban pynkiew kyrdan noh ia ka Rymbai GSS sha ka Higher Secondary namar kumba long mynta kane ka skul ka dei tang ma ka, ka secondary school jong ka sorkar ha baroh ka East Jaintia. Ka seng ka la pynsngew  ia kane namar ka la ju don ka proposal na ka school bad khamtam ba ka building thymmai ka la dep bad kaba la biang bha ban kyntiew ia ka ka skul.

Ka seng ka la buh ruh da jingthoh sha ki Director ba kin khot noh da ka jingpynbna  paidbah khnang ba ki nongthep kin lah ban tip ha kaba iadei bad ki kam kiba lait.

Ha kaba iadei bad ki artylli ki jaka pule kata ka Residential School bad ka jaka pule pyntbit ia ki nonghikai ba la ieh lyngkrang khlem da ka pyntreikam satia mynta la 8 snem ei ei, ka seng ka la iakren bad kine ki Director ban khmih biang bad ban iakren bad ka sorkar ban pyntreikam noh namar kan long ka jingmyntoi ia ki khun samla ka thaiñ naduh kiba pule bad ha ka ioh kam ioh jam ruh.

Nalor kata ka Seng lyngba u kyrwoh ka la ong ruh ba ka dang iai buddien ruh ia ka jingshah ieh shrah kane ka residential school bad ka Block Institute of Teachers Education (BITE) kiba don ha district bad pynpaw ruh ba ki la ioh jingtip ba ka tnat ba dei peit ka dang ialeh ban ioh pisa ban pynbha bad tei biang ia ki khamtam na ka central fund.

Ha kane ka jingiakynduh na ka ling u Director ka DSEL u la ai khublei ruh ia ka seng kaba la pynsngew ia kine ki mat bad u la kualr ruh ban buddien khnang ban lah ban pynkloi ia kane ka kam na ka bynta ka jingmyntoi jong ki nongshong shnong ka district hi baroh kawei.

Haba iadei bad ka BITE ka seng ka la ioh jingtip ba ia kane ka project ym shym lah ieh shrah hynrei ka dang don hapdeng ka jingpynkhreh ban pyntrei noh. Shuh shuh ka seng ka la kyrpad ia ki bor ba dei peit ba kin leit jurip ia kane ka building bad ruh ban tip haduh katno lah duhnong bad hap pynbha khnang ba ka jingtei kan nym long kaba sepei.

Shuh shuh ka seng ka la ong ruh ba ka sngewthuh ba  kane ka project ka dei na bynta ka Block Institute of Teachers Education bad ka seng ka iai ban ba ia kane ka project ka dei ban kyntiew noh shisyndon sha ka District Institute of Teachers Education (DITE) khnang ba kan long ka jingiohnong ia ka district hi baroh kawei.Haba iadei bad ki residential school ka seng ka ioh jingtip ba ka tnat ba dei peit ka dang ialeh ban ioh pisa ban pynbha bad ban tei biang bad ia kane lah ban mang na ka central fund ka sorkar pdeng .

Ka seng ha kane ka sngi ka la pynsngew ruh ha kaba iadei bad ka National Institute of Open Schooling (NIOS) ha kaba ka seng ka la ong ba kan sa thoh sha u Regional Director jong kane ka shlem aijinghikai khnang ba ki nongshong shnong ka district kin lah ban ioh myntoi, bad ruh khnang ba kito kiba la pep skul shiteng por ruh kin lah ban bteng biang ia ka jingpule ka jong ki.

Na ka liang ka Seng ka la ai copy ruh  sha u Chairman ka Estimate committee u Bah Mayralborn Syiem ha kaba iadei bad kane ka mat jong ki building, ha kaba ka la kyrpad ruh ia ki bor ba dei peit ban pynkloi noh ia kane ka kam.