Dawa tohkit ka HYC halor ki jingdkoh ha ka jingpyntreikam ia ka skhim Mid Day Meal ha ka Jylla

Syllad | The Rising MeghalayaApril 12, 2025

Ka Hynniewtrep Youth Council (HYC) ka la dawa ban pynlong da ka jingtohkit halor ki jingkynnoh ba ka don ka jingdkoh ha ka jingpyntreikam ia ka skhim bam ja sngi ne Mid Day Meal ha ki skul sorkar ha kylleng ka jylla.

Ha ka shithi ba la ai sha u Myntri Rangbah ka Jylla u Conrad K Sangma, u Education Secretary ka HYC u samla Enlang Sawian u la ong, “Nga kyrpad jur ia phi kum u khlieh ka sorkar jylla ban thaw da ka committee ban pynlong ia ka jingtohkit ban bishar bniah halor ka rukom sam ia ki jingbam lyngba kane ka skhim kaba kynthup ia ki managing committee jong ki skul lem bad kiwei pat ki tnad kiba don bynta.”

“Nalor kata, ka long kaba kongsan ban pynngat ia kito ki briew kiba donkti ha kaba pyndonkam bakla ia ka bor jong ki, bad ban pynthikna ba ka skhim Mid-Day Meal ka dei ban long kaba iaid beit iaid ryntih khnang ba ki khynnah skul kin ioh ia ki jingbam kiba tei kumba ki dei hok ban ioh,” u la bynrap.

Kane ka jingdawa ka dei kaba la pynshong nongrim katkum ka jinglap lyngba ka Right to Information (RTI) halor ka skhim PM (Poshan) ha kaba la shem ba ka jingpyntreikam ia ka skhim Mid-Day Meal ha kine ki skul ka long kaba duna shibun.

Haba kdew katkum na ka jinglap, une u nongialam ka seng u la ong ba ki don ki jingbym iahap bad bym biang ha kaba sam ia ki jingbam da ki managing committee bad ki bor pyniaid skul.

“Ka jinglap katkum ka RTI ka pyni ba ki jingbam ia kiba dei ban sam man ka sngi na ka bynta ki khynnah kiba pule ha ki kyrdan Lower Primary School kim shym la pynbiang katkum ka jingbthah katkum ki kyndon jong ka skhim,” u la ong da kaba bynrap, “Ki kaiphod lyngba ki khynnah skul khamtam ha ki thain nongkyndong ki pyni ba kiba bun ki skul ki la sam ia ki jingbam tang arsien shi bnai, bad katto katne kiba ioh tang shisien shi snem. Nalor kata, ki don ruh ki khep ha kaba ki skul kim shym la sam satia ia kane ka bam sha baroh kiba dei ban ioh da kaba kdew ia ki jingeh ha ka ban ioh pdiang ia ki marbam.”

Nalor kata, ka jubab RTI na ka PM Poshan ka kdew ba ia ka menu ba la buh beit da ka NESFAS ym shym la bud ryntih bad kaba lam sha ka jingduh ia ki jait jingbam kiba tei bad kiba bha lyngba ki jingbam ba la sam sha ki khynnah skul.

“Kane ka jingpyniaid ba bakla kaba mynta bad ka jingbym shai ha kaba pyntreikam ia kane ka skhim ka la khanglad shibun ia ka hok jong ki khynnah kiba dei hok ban ioh jingmyntoi. Nalor kata, kane ka jinglong jingman ym tang ba ka long pyrshah ia ka thong jong ka skhim Mid Day Meal, hynrei ka ktah ruh ia ka koit ka khiah bad ka jingmih ha ka liang ka pule puthi jong ki khynnah kiba shaniah lyngba kine ki jingbam,” ong u samla Enlang.

“Kumta ka long kaba donkam kyrkieh ban pynbeit ia kine ki jingdkoh khnang ban pynthikna halor ka jingpyntreikam hok ia kane ka skhim da kaba pyndep ia ka jingthmu ban pynbiang ia ki jingbam ba tei sha ki khynnah kiba donkam hok,” u la bynrap.