Dawa tohkit ka TMC ba khyllem biang ka kynroh jong ka PA Sangma Sports Complex

Syllad | The Rising MeghalayaJune 3, 2024

Ka liang pyrshah Trinamool Congress (TMC) ha ka 2 tarik Jylliew ka la dawa ban pynlong jingtohkit da ka kynhun ba laitluid halor ka jingkhyllem biang ka kynhun jong ka PA Sangma Sports Complex ha Tura, West Garo Hills bad ban pynngat dak iong (blacklist) pyrshah ia ka Badri Rai and Company (BRC), kaba pyntrei ia kane ka project.

“Ka long kaba donkam ban pynlong ia ka jingtohkit kaba bniah da ka kynhun kaba laitluid khnang ban lap ia ki jingshisha baroh bad ban shim ia ki lad jingpynshitom pyrshah ia kito kiba donkti ha kabe k kam, kata kynthup ia u Myntri bad u Myntri Rangbah ka Jylla ruh lada donkam,” ong u State Youth President ka TMC u Richard Marak lyngba u kyrwoh.

“Nalor kata ka long ruh kaba donkam ban pynngat dak iong pyrshah ia ka Badri Rai and Company (BRC) na ka jingiashim bynta ha kino kino ki projek kiba hadien habud hapoh ka Jylla khnang ban lah ban tehlakam ia kiba kum kine ki jingjia,” u la bynrap.

“Kumba don ka jingong, ‘Ki kam ki kren kham jan ban ia ka ktien,’ Kumta ruh ki nongshong shnong ka Meghalaya ki dei hok ban ioh ia ka sorkar kaba buh shwa hakhmat ia ka jingtreikam kaba khuid ba suba bad kaba bit ba biang na ka bynta u paidbah,” u la ong.

Nalor kata u Marak u la ong ruh ba kane ka jingkhyllem ba khah khah bad ka jingiadei kaba jan hapdeng ka Badri Rai and Company (BRC) bad ka sorkar NDA ka la wanrah jingeh ia ka jylla bad buh ruh ia u dak jingkylli halor ka jingkhuid ha ki rukom treikam kumba la sakhi na ki jingjia ba dang shen.

“Ka jingkhyllem kane ka kynroh jong ka PA Sangma Stadium ka la jia mynta lah arsien tang ha i por ba khyndiat, kaba la buh jingkylli ruh halor ki tiar ki tar ba la pyndonkam bad halor ka rukom pyntrei ia kane ka kynhun,” ong utei u nongialam ka TMC uba la bynrap ruh ba ka jingioh kurup ia ka pisa kaba T.1 klur na ka kali jong ki heh katei ka kompeni BRC kaba bud nadih ka kynhun ki kali jong u Myntri Rangbah ka Jylla ka pynpaw ia ka jingdonkam mardor ban ioh jingshai. Wat hadien ka histori jong ki jingpulom ba khah khah ha ki jingtreikam jong kane ka kompeni, hynrei ka dang iai bteng ban don bynta ha ki projek kiba heh kaba pynpaw ruh ia ka jingpulom jong ka sorkar.”

Nalor kata une u nongialam ka TMC u la ong ruh ba ka jingkhyllem jong kane ka kynroh bad ki mat kiba iadei bad ka jingpyntrei ia kane ka projek ka pynpaw shuh shuh ha ka jingleh thurmur bad halor kiwei pat ki bynta kiba kham khraw. Watla la tei hapdeng jong ka jaka sor khlem da don ia kino kino ki jaka pynieng kali kiba biang hynrei ka jinglut ha kaba tei ia kane ka stadium ka la kot shaduh ka T.172 klur, u la ong.