Dawa tohkit ka TMC ia ka jingkynnoh pyndonkam ka NPP da ka pisa beain ban beh thong ia ki MLA

Syllad | The Rising MeghalayaAugust 24, 2024

Ka liang pyrshah All India Trinamool Congress (TMC) ka la dawa ban pynlong da ka jingtohkit halor ka jingkynnoh jong ka Seng Congress ba ka Seng National People’s Party (NPP) ka la pyndonkam da ka pisa beain ban beh thong bad thied ia ki MLA na kiwei pat ki seng sain pyrthei.

Haba kren sha ki lad pathai khubor ha ka 23 tarik Nailar, u nongialam ka TMC uba dei ruh u Myntri Rangbah barim u Dr Mukul Sangma u la ong ba u President ka Congress u Bah Bah Vincent H Pala u la ther da kaba tyngeh da kaba ong ba ka Seng kaba don ha ka liang synshar ka la beh thong ban khring ia ki MLA na kiwei pat ki seng sain pyrthei da kaba pyndonkam da ka pisa beain.

“Haba kine ki jingkynnoh ki la mih, kumta ruh ka sorkar bad ki nongialam ki dei ban pynpaw ia ka jingkhuid halor kane bad nga kyntu ban pynlong da ka jingtohkit kaba bniah halor kane ka phang,” u la ong.

U Mukul u la ong ruh, “Ki don laitylli ki jingkynnoh. Kawei ka dei halor ka pisa beain ia kaba la kynnoh ba ka la wan lyngba u drok, kawei pat ka jingkynnoh ba ka pisa ka la wan na ka jingtih dewiong beain bad kawei ka jingleh thok ia ki kam kontrak. Kumta lada kine ki laitylli ki jingkynnoh ki la wan mih, ka long kaba donkam ba ka iingdorbar ba kan iakren halor kane.”

Haba kylli, une u nongialam ka TMC u la ong ba ka seng kan sa peit ia ki lad ki lynti ban rah ia kane ka mat hapoh ka iing dorbar thaw ain ka Jylla.

Haba kyntu ia ki paidbah ban dawa na ka liang synshar ba kan kren shai halor kane ka jingkynnoh, u Mukul u la ong, “Kumta ruh, ki paidbah ki dei ban kylli ia ki ba hato ki donkti shisha ha kiba kum kine ki kam beain, kata kaba dei ka mat kaba sngewkhia jur na ka bynta ka jylla bad ki nongshong shnong.”

U la ong ruh, “Lada ki don ki daw ban ngeit ba ka don ka jingpyndonkam da ka pisa beain, kumta ruh nangno kane ka pisa beain ka wan bad ha kano ka rukom? Kumta kane ka mut ba ki paidbah ki dei ban buh jingkylli bad ba ka sorkar ka dei ban long khuid halor kane ka bynta, kim lah ban shu sngap jar, kim lah ban shu leh klet. Ka dei ka jingkynnoh kaba khia shibun namar lada kine ki jingkynnoh ki dei kiba shisha kumta ruh phi lah ban sngewthuh kaba kum kano ka lawei kaba ngin sakhi ha ki sngi ki snem ki ban wan.”

Lah ban kdew ba dang shen u nongialam ka Congress uba dei ruh u MP barim ka Shillong u Bah Vincent H Pala u la pynmih ia kine ki jingkynnoh hadien ka jingleit pyniasoh jong ki laingut ki MLA ka Congress sha ka seng NPP.