Dawa tohkit ka VPP ba pulom ka Sorkar ban pynlong ia ka elekshon JHADC kaba khuid ba suba 

Syllad | The Rising MeghalayaApril 15, 2025

Ka liang pyrshah Voice of the People Party (VPP) ha ka 14 tarik Iaiong ka la dawa ban pynlong da ka jingtohkit ba laitluid bad kaba buh da ka por ha kaba iadei bad ka jingkynnoh pulom jong ka Sorkar bad ki bor pyniaid District ban pynthikna halor ka jingpynlong ia ka elekshon Jaintia Hills Autonomous District Council (JHADC) ba la dep kaba laitluid bad kaba khuid ba suba.

Ha ka shithi sha u Chief Secretary ka Jylla u Bah DP Wahlang, u General Secrtary ka VPP uba dei ruh u MP ka Shillong, u Dr Ricky AJ Syngkon u la ong, “Ngi kyntu jur ia ka ophis jong phi ban pynlong da ka jingtohkit ba laitluid bad kaba buh da ka por halor baroh ki jingjia haduh ka por ba pynlong ia ka jingiathep vote ha ka 21 tarik u Rymphang 2025 ha Wapung Skur A bad B, Bataw A bad B lem bad kiwei pat ki jingjia ha kiwei pat ki Polling Station bad ba balei ym shym la shim ia ki sienjam ban pynbiang ia ki bor pahara khnang ban pynthikna ia ka jingiathep vote kaba laitluid bad kaba khuid ba suba ha ki artylli ki district ka Rilum Jaintia.”

La ong ruh ba dei ban pynbahkhlieh ia kito kiba donkti halor ka jingpulom ha ka liang ki bor pahara bad ka jingpulom ban leh ei ei wat hadien ba la dep ban pyntip bad ban maham lypa kumjuh ban pynthikna ba ka jingpynlong ia ki elekshon ki ban wan ka dei ban long kaba laitluid bad kaba khuid ba suba bad kaba shgain na ka bynta baroh ki nongshong shnong bad na ka bynta ki seng sain pyrthei kumjuh.

U Dr Syngkon u la ong ba hashwa ka tarik thep vote, da kaba pynshong nongrim katkum ki jingioh jingtip, ka VPP ka la iathuh ia ki katto katne tylli ki polling station hapoh ki constituency kum kiba don jingma kumjuh kiba lah ban mih ka huri hura.

“Ban pynthikna halor ka elekshon kaba laitluid bad kaba khuid bad suba ka Party ha ka 14 tarik Rymphang ka la kyrpad ia u District Election Officer, West Jaintia Hills District, Jowai bad u District Election Officer, Khliehriat ba kin pynbiang ia ki bor pahara, ” u la ong da kaba bynrap ba kane ka jingkyrpad ka long ban khanglad ia kino kino ki jingpyrshang ban pyntieng pynsmiej ia ki nongwan thep vote, ban leh donbor ha ki jaka thep vote lane kino kino ki kam kiba lah ban pynthut ia ka jingiathep vote.

U la kynnoh ruh da kaba ong, “Wat hadien ba la aijingtip lypa bad ka jingkyrpad kaba la kdew kyrpang hynrei ym shym la shim ia ki lad jingiada kiba biang da ki District Election Officer ban pynthikna ia ka jingpynbiang pahara ha kine ki jaka kiba shongsyier. Ba ha ka sngi thep vote, kata ha ka 21 tarik Rymphang, kila mih bun tylli ki jingjia pyni bor ha ki jaka thep vote bad ki jingleh thok ha kiba buntylli ki polling station ha baroh ki ar district jong ka East bad West Jaintia Hills. Ba ka jingdon jong ki bor pyniaid elekshon ha ki polling station kim lah ban leh ei ei ha ka jingbym don ia ki bor pahara kiba biang bad kaba la ktah jur halor ka jingpynlong ia ka jingiajied kaba laitluid bad kaba iaid beit iaid ryntih.”

Une u nongialam ka VPP u la pynpaw ruh ha ka shithi ba ki artylli ki jingjia kiba la jia, kata ha kaba ki kynhun runar ki la rung jubor hapoh ki polling station bad leh ia ki kam pyntriem da kaba pynjulor ia ki Electronic Voting Machines (EVMs) ha ki sawtylli ki polling station kiba hap hapoh kitei ki ar district ha kaba la hap ban pynsangeh noh ia ka jingiathep vote.

U la ong ba kine ki jingjia ki la lam sha ka jingpynlong biang ia ka jingiathep vote ha ki sawtylli ki polling station, kata ha Wapung Skur A bad Wapung Skur B kiba hap hapoh Musniang-Rangad constituency bad ha Bataw A bad Bataw B kiba hap hapoh Bataw-Lakadong constituency.

Kaba la nangpynsniew shuh shuh ia ka jinglong jingman, u la kynnoh ba ki nongpyniaid elekshon jong ka Voice of the People Party ki la shah khanglad ban rung shapoh ki polling station ha ki riew pyni bor jong kiwei pat ki seng sain pyrthei kiba ia aireng, bad kane ka la khanglad ia ki nongmihkhmat ka VPP ba kin jurip lane ban aijingtip halor ki jinglong jingman.

Ban iada ia ki hok synshar paidbah jong ki nongthep vote, ka VPP lyngba ka shithi kaba 21 tarik Rymphang ka la kyrpad kyrkieh ia u Superintendent of Police, East Jaintia Hills District, Khliehriat, ba un pynbiang mardor ia ki bor pahara ia ki nongshong shnong ka Wapung Skur ha ka por ba la pynlong biang ia ka jingiathep vote ha ka 22 tarik Rymphang.

U Dr Syngkon u la ong ruh ba wat hadien ba ka party ka la pyntip sha ki bor sorkar halor ka jingsyier ha kine ki polling station, hynrei ym shym la shim satia ia ki sienjam ban khanglad ne ban tuklar ia kine ki jingpynthut kiba triem bad kiba la ktah ia ka jingpyniaid beit ia ka elekshon kaba laitluid bad kaba khuid ba suba.

Lah ban dkew ba ka VPP ka la jop tang 8 seat ha kane ka elekshon sha ka JHADC kaba dang shu dep.