Dawa tohkit u CM halor ka jingsuba shah pyniap u samla Garo hapoh rehab ha Assam

Syllad | The Rising MeghalayaJuly 10, 2024

U Myntri Rangbah ka Jylla u Conrad K Sangma u la dawa ia ka jingtuklar lem jong u Myntri Rangbah ka Assam u Himanta Biswa Sarma na ka bynta ban pynlong ka jingtohkit halor ka jingsuba shah pyniap dusmon jong u samla Niksamseng Ch Marak hapoh ka rehabilitation centre ha Goalpara.

Ha ka shithi sha u Sarma u Sangma u la ong ba une u nongshong shnong ka Jylla u Niksamseng Ch Marak u la shah kem noh ha ki pulit ka Assam ha ka 2 tarik mynta u bnai ha kaba la set ia u hapoh ‘New Life Foundation Centre, Nayapara, Goalpara.’ Hynrei, tang hadien ar sngi la shem ba une u samla u la iap hapoh kane ka centre ha ka rukom kaba don eiei sha lyndet.

Katkum ka jingpyntip da kiba haiing hasem jong une u lanot la ong ba ki bor ba dei khmih jong katei ka centre ki la kam ba ka dei ka jingshim hi ia la ka jingim, hynrei hadien ki la kylla ktien bad kaba la pynartatien halor kane ka jingiap jong u.

“La pyntip sha nga ba ka metiap jong une u lanot ka don ia ki dak mynsaw jur, kata kaba kynthup ia ki dak shah dung tari ba jylliew na shiliang ka durkhmat ka diang jong u, ka jinging ding, ka jingmynsaw na ki bynta jong ka tmoh, syngkai bad ki kjat. Katkum na ki dak ki shin la sakhi ba une u samla u la shah pynshitom bein da kaba shah bom shah tied bad shah dung hapoh kane ka rehab centre,” u la ong.

“Kumta namar kine ki jinglong jingman ba la kdew, Nga kyrpad ia phi ban pynlong mardor ia ka jingtohkit halor kane ka jingjia, kata ia kaba la angnud ruh da kiba haiing hasem jong une u lanot na ka bynta ban ioh ia ka jingbishar hok.

“Halor kane ka jingjia na ka liang kiba haiing hasem jong une u lanot ki la ujor ruh da ka ejahar, kumta ka jingtuklar lem ka jong phi halor kane ka jingjia da kaba pynlong ia ka jingtohkit kaba bniah kan long kaba biang eh,” ong u CM ha ka shithi sha u Sarma.

Ha kajuh ka por na ka liang u CM u la ai ruh ka jingiaroh halor ka jingshimkhia jong ka Seng National People’s Youth Front (NPYF) ha kaba iadei bad kane ka jingjia.