Dawa tohkit u MDC ka BJP halor ka jingpyndonkam bakla ia ka pisa da ka EC barim ka GHADC

Syllad | The Rising MeghalayaSeptember 2, 2024

U MDC ka BJP na Tura u Bernard N Marak u la dawa ban pynlong da ka jingtohkit halor ka jingkynnoh pyndonkam bakla ia ka pisa da ka Executive Committee barim ka GHADC bad halor ka jingbym pyntreikam ia ka jingiateh bad ka kynhun kieng atiar ANVC ha kine ki 10 snem kiba la dep.

Ha ka shithi sha u Myntri Rangbah ka jylla u Conrad K Sangma haka 1 tarik Nailur, u Marak u la ong, “Namar kata la dawa ban pynlong da ka jingtohkit kaba halor kane ka phang.”

U Marak u la ban jur ruh halor ka jingdonkam ia ka sorkar ba kan shimkhia ia kine ki mat kiba la nangpynjur ia ka jingtyrkhong ka pla tyngka jong ka GHADC namar ka jingpyndonkam bakla da ki Executive Committee barim ia ka pisa kaba thmu na ka bynta ka GHADC.

Haba pynpaw ba ki jingdawa jong ki nongtrei ka GHADC na ka bynta ban pyntreikam ia ka 5th Pay Commission ki long kiba shongnia, une u MDC ka BJP ula ong ba ia ka jingpynbna ne notification la pynmih da u CEM ka GHADC jong ka NPP ha u 2018 na ka bynta ban mynjur ban pyntreikam ia ka Fifth Meghalaya Pay Commission katkum ka no F(PR)-49/2017/192.

U la ong lyngba kane ka jingpynbna la bthah ia baroh ki Tnad ban pynkhreh ia ka jingsiew bad ki allowance jong ki ophisar bad ki staff ha ka jingpynkylla thymmai ia ka jingsiew katkum ki kyndon jong ka Meghalaya Services (Revision of Pay) bad kiwei pat ki rules ka ban sdang naduh u bnai Iaiong 2018. Hynrei ia kane ka jingpynbna ym shym la burom bad bud da kiwei pat ki Executive Committee kiba dei barabor na ka Seng NPP.

“Naduh u 2018 haduh kine ki sngi ba mynta, la pynkhreh ia ka mang tyngka bad mynjur ha ka 5th Pay Commission Scale, hynrei ki nongtrei ki dang iai bteng ban ioh ia ka jingsiew hapoh jong ka 4th Pay Commission. Kumta la iohi kumba ka don ka jingbakla kaba khraw ha ka Executive Committee ia kaba nga iai ban ba phin shim khia ia kane ka kam kaba lah ban long ka bamsap kaba shyrkhei,” ong u Marak haba kyntu ia u CM ka Jylla.

“Nga kwah ruh ban pyntip sha phi ba hadien ka jingsoi ia ka jingiateh jingsuk da ki kynhun ANVC, ka Sorkar Pdeng  bad ka Sorkar Jylla ha u snem 2014, la mang T.100.71 klur kum ka song pisa ba kyrpang bad bud sa kiwei pat ki jingiarap pisa ha ki snem kiba hadien hapoh ka jingsynshar ka NPP ha GHADC kaba la wanrah ia shibun ki jingdkoh ha kaba ki don kiba dang sahkut hapoh Kashari bad kiwei pat ki dang don hapoh ka jingtohkit. Watla ia ka song pisa la ai jingmynjur lyngba ka jingiateh, hynrei ia ki dkhot jong ki kynhun ANVC ym shym la pyntip satia ne ban buh ha ka komiti peitngor da ka Sorkar Jylla watla la rai ha ki jingialang bishar bniah la rai ban thung na ka ANVC.B ban long dkhot, ” ong u Marak.

“La pynïaid ruh ïa ka pisa khlem ka Finance Commission kaba don ha ka Jylla, kaba la pynkheiñ ïa ka jingïateh kular, kaba la wanrah ïaki jingthurmur ka rukom pyndonkam iaka pisa da ka EC kaba rim, kaba la pynkheiñ ïa ki kyndon da kaba pyniaid sha wei pat iaka pisa T.53 klur na ka Centre Funds ban siew ïa ki tulop jong ki nongtrei, kaba ha ka jingshisha ym shym la siew satia sha ki nongtrei. Wat ka 40% na ka pisa bala mang ha ka kyrteng jong ki projek ki jah na ka account jong ka Council khlem siew sha ki kontraktor. Kumta, la dawa ban don ka jingtohkit halor kine ki mat,” u la pynpaw.

Shuh shuh u MDC u la kyntu ïa u CM ba un shim khia bha ïa ka jingïateh kular ka ANVC ha 2014 bad ban khot ïa ka jingïalang ban bishar bniah ïa ka jingpyntreikam iaka soskular, namar i kumba ka Jylla kala lehbor ïa kiba bun ki projek khlem ka jingtip jong ka kynhun.

“Kane ka dei ka jingshukor kyllum ia ki paidbah Garo baroh. Kumta Nga kyntu jur ia u CM ba un khmih bniah halor kine ki bynta na ka bynta ka jingbit jingbiang jong ki paid nongshong shnong ka Rilum Garo kiba la shah pynduh noh ia ki hok na kane ka jingiakut, ” bynrap shuh shuh u MDC ka BJP.