Dawa tohkit u nongtrei kam bhalang halor ka jingkhaii maw beain na Bhutan sha Bangladesh lyngba ki jaka na Meghalaya

Syllad | The Rising MeghalayaDecember 29, 2024

U nongtrei kam bhalang u Cherian Momin ha ka 28 tarik Nohprah u la dawa ban pynlong da ka jingtohkit kaba laitluid halor ka jingkynnoh ba ki don ki kam beain bad shim kabu ha kaba iadei bad ka jingshalan maw thup na Bhutan sha Bangladesh lyngba ki jaka puta jong ka Meghalaya.

Katkum ka jingong jong u, ka sorkar ka dei ban shimkhia ban pynsangeh ia ki kam shalan beain bad ban pynjari ia ka jingbud ryntih ia ki kyndon ain ha ki kam shalan maw shabar ri.

Ha ka shithi sha u Myntri Rangbah ka Jylla u Conrad K Sangma, u Momin u la kynnoh ba kine ki kam wat la ki long kumba la pynlong hapoh ka jingiateh kular khaii pateng hapdeng ka Bhutan, India, bad Bangladesh, hynrei ki la don ia ka jingiadei halor ka jingkit palat pud, ka jingkit ba khlem jingbit, ka jingdawa pisa, bad ka jingpynjulor ia ki jingtei.

“Ka long kaba donkam ia ka sorkar jylla ba kan shim khia mardor ban pynsangeh noh ia kine ki kam beain, ban pynthikna ia ka jingbud ryntih ia ki kyndon jong ka jingiateh kular, bad ban iada ia ki jingmyntoi jong ki paidbah bad ki jingtei jong ka Meghalaya,” u la bynrap.

U la pynpaw ruh ba ka jingiateh kular ki lai kynhun ka dei ka sienjam kaba dei ban iaroh namar ka jingkyntiew ia ka khaii pateng bad ka jingiatreilang ha ka thain. Hynrei ka long kaba kongsan ban tip ba kane ka jingiateh kam shah ia ka jingkit palat pud jong ki trok, ki kam leh donbor marwei da ki mafia kit jingkit, lane kino kino ki kam beain da kiwei pat ki kynhun.

“Kaba sngewsih ka long ba ka jinglong kaba mynta ka iapher shibun na ka jingthmu ba la thmu jong ka jingiateh. Ka la poi ha ka jingtip jong ngi, kaba la kyrshan da ki sakhi kiba skhem ba ki trok kiba la pyndonkam mynta ban kit maw kim dei satia na Bhutan.”

“Kane ka dei ka jingpynkhein beit ia ki kyndon jong ka jingiateh, kaba shim ba ki trok Bhutan kin kit ia ki maw thup. Nalor kata, ka dei ka jingshisha ba ki trok kiba bun tylli ki axle, kiba mynta la iohi ba ki treikam bha ha kine ki lynti, kim treikam ha Bhutan. Kane ka pynmih ia ki jingkylli kiba khia shaphang ka jingshisha halor ka jingiaid kaba katkum ka ain ha kine ki jingtreikam,” ong u Momin.

Haba kyrpad ia ka sorkar ba kan shim ia ki sienjam, une u nongtrei kam bhalang u la ong, “Dei ban pynsangeh noh mardor ia ki jingtreikam jong ki trok third-party na India kiba kit maw mynta. Dei ban dawa na ki bor synshar ka Bhutan ban pynthikna ia ki jingtip ba bniah jong ki trok ba la ai bor ban kit maw na ki bynta bapher bapher ka Jylla Meghalaya.”

Nalor kata u la ai jingmut ruh ba ka Sorkar Meghalaya ka dei ban pynbiang ia ka lynti kaba kyrpang bad kaba shai na ka bynta ban kit ia ki maw da kaba bynrap “Ïa kane ka lynti dei ban pyntip da ka jingthoh sha baroh ki liang kiba iadon bynta, bad ha kano kano ka rukom ym dei ban pyndonkam ia ka lynti Tura-Paikan-Dalu na ka bynta kane jingthmu.”

“Baroh ki kam kit jingkit ki dei ban bud ryntih ia ka ain kaba pyniaid ia ka jingkit jingbah bad ka khaii pateng ha India, kynthup ia ka jingkhia kaba lah ban shah katkum ki kyndon na ka bynta ki kali bad ki kyndon ban iada ia ka mariang,” u la ong.

U Momin u la dawa ruh ba dei ban pynlong ia ka jingtohkit kaba laitluid ban lap bad ban buh jingkitkhlieh ia ki briew, ki kynhun, bad ki seng kiba donkti ha kine ki kam beain.

Kumta ruh u la kyntu jur ia u Myntri Rangbah ka Jylla ba un shim khia ban weng mardor ia kane ka mat kaba khia shibun da kaba shim ia ki sienjam kiba tyngeh khnang ban pynsangeh ia kine ki jingtreikam kiba beain bad ban pynjari ia ka jingbud ryntih ia ki kyndon ain bad ban iada ruh ia ki jingmyntoi jong ki paidbah ka Meghalaya bad ia ka jinglong ba janai jong ka jingiateh  hapdeng ki lai kynhun.