Dawa tuklar ka HBDRF naka MHRC ba thombor ka Assam ia ki nongshong shnong ka Labang Nongphyllut

Syllad | The Rising MeghalayaJanuary 8, 2025

Ka Hynniewtrep Border Disputed Redressal Forum (HBDRF) ha ka 7 tarik Kyllalyngkot ka la kyntu ia ka jingtuklar lem jong ka Meghalaya Human Rights Commission (MHRC) halor ka jingkynnoh pynkhein ia ki hok longbriew manbriew da ka sorkar Assam pyrshah ia ki paidbah nongshong shnong ka Labang Nangphyllut ha West Jaintia Hills district.

Ha ka shithi sha u chairperson ka MHRC, ka forum ka la ong, “Ngi kyrpad ia ka National Human Rights Commission ba kan tuklar lem kham kloi halor kane ka mat khnang ba ka Sorkar Jylla ne ka Sorkar Pdeng kin don ia ka jingsngewkhia na ka bynta ki briew jong ka thain .”

Ka la ong ba hapdeng ki snem 2000 haduh 2017 -18, ki nongshong shnong ka Labang Nangphyllut ki la mad shibun ki jingshah thombor ha ka kynhun lehnoh Karbi ba la tip kum ka Karbi National Volunteer (KNV) Karbi People Liberation Tigers (KPLT) Karbi Longri Raikom Asong (KLRA) United People Ka Democratic Solidarity (UPDS) bad kiwei kiwei.

“Kine ki kynhun kaikhlaw kila dawa pisa hapdeng T.1000 haduh T.5000 na kawei ka iing kum ka House Tax man la u snem. Ki dawa ruh shibun ia kito kiba don lyngkha kba bad ki masi kum ki muid bad kiwei kiwei. Ki ju wan rung shapoh ki shnong ki thaw bad knieh ia ki mar ki mata kynthup ia ki masi, ki syiar, blang, sniang, kba, jhur bad kiwei kiwei. Ki leh ruh ia ki kam khlem akor pyrshah ia ki kynthei bad ki khynnah, ki la ktahkti bad thombor ruh ia ki khynnah shynrang bad ia uwei u briew uba la kham rangbah khlem kano kano ka jingbakla bad khlem ka jingisynei,” ong ka shithi.

Nalor kata ka la ong ruh ba namar kine ki kam runar jong kine ki kaikhlaw Karbi, na ka liang ki paidbah kane ka thain ki la hap ban iehnoh ia la ka jong ka ka iing ka sem bad phet sha ka shnong Sahsniang ha u bnai Nailar 2003 kaba la tip kum ka, “Sahsniang Refugee”. Ia kane ka jingphetwir la tip kylleng ka ri lyngba ki khubor bad kiwei kiwei ki jingpyntip.

Ha kane ka por, baroh arngut ki Myntri Rangbah ka Assam bad Meghalaya, u Dr. D.D Lapang na Meghalaya bad u PK Mahanta na Assam ki kular ia ki paidbah ka Labang Nangphyllut ha Refugee Camp ban pynbeit noh ia u pud u sam bad ban pynkynriah biang ia kane ka bynta jong ka jaka sha ka ka jylla Meghalaya hynrei ym shym la pyndep,” ka la ong haba bynrap “Ynda ki la wanphai sha la iing bad shnong na kine ki ktem, la jan baroh ki iing ki sem jong ki, ki la shah pynjulor, ki lyngkha kba jong ki, ki jaka rep jong ki ki la shah pynjulor bad baroh ki mar ki mata bad ki jingdon jingem jong ki, ki la duh noh. Ki la iakynduh ia ka jingeh kaba khraw namar kim don jaka sah ym don jain ym don bam bad kiba bun ki briew ki la iap namar ka jingthngan bad ka jingkyrduh bam, bad napdeng kine ki jingjynjar bad jingsngewsih baroh kim shym la ioh jingiarap ei ei na ka Sorkar.”

Ka Forum ka la ong ba kijuh ki jingjia ki la jia ha ki bnai Naitung bad Nailar 2015, lyngba ka jingshah thombor jong ki kynhun runar Karbi pyrshah ia ki paid Khasi-Jaintia. Da ki hajar ngut ki paid Karbi kila wan rung ha ka shnong Madan Myn-i , Mooriap, Mookhim bad kila thombor’ ia ki khlem ka jingmap. Ha kane ka kynti ruh, ki paid Khasi Jaiñtia ki la hap ban phet sha ki shnong ba marjan jong ka Meghalaya ba kynthup ha Mooluber, Khanduli , Lapangap, Saitsama, Namdong ha Jowai.

Shuh shuh ha kajuh ka sngi HBDRF ka la kyntu ia u Myntri Rangbah ka Jylla u  Conrad K Sangma ba un iakren bad ka sorkar Assam na ka bynta ban pynduna ha kaba iadei bad ka khajna halor u Synsar.

Ha ka shithi sha u Myntri Rangbah, ka Forum ka la ong, “Na ka liang jong baroh ki paid Khasi Pnar jong ka Block -I & II, (ngi) kyrpad ia phi ba phin shim khia ban iakren bad u Myntri Rangbah ka Assam na ka bynta ban pynduna ia ka khajna halor u Synsar.”

Ka la ong ba ka Sorkar Assam kam pat shym la ithuh satia ia u Synsar kum u mar rep hynrei la shim ba u dei u mar khlaw.

“Kumta ruh kane ka la pynioh kabu ia ka Tnad Forest ka Assam bad ka Tnad Forest jong ka Karbi Anglong Autonomous Council ba kin shim da ka khajna kaba heh halor u Synsar, ha kaba mynta ka jinglum khajna ka long haduh T.12,000 haduh T.15,000 na ka bynta kawei ka kali Mahindra Bolero Pick-up Truck,” ong ka shithi da kaba bynrap, “Namar ka jingsniew jong ka surok ka Pickup ka lah ban kit tang kumba 1.2 metric ton, kata 1200 kilo, katba ka khajna ka la kot sha ka T.10 haduh T 12 na ka bynta shi kilo.Kumta na ka liang ki Khasi Pnar ka thain Block I& II ki hap ban mad ia ka jingduhnong kaba khraw bad ba ka jingtrei shitom ka jong ki ka la shu long lehnoei.”

“Kumta, ngi kyrpad jur ia phi ba phin tuklar mardor shwa ka por ban die ia une u mar (Kyllalyngkot 2025) khnang ba ki nongrep jong ngi kiba sah ha ki jaka ba don ka jingiakynad kin ioh ia ka dor kaba biang kumba ki dei hok ban ioh,” bynrap ka Forum.