Dawa tuklar ka KSU ia ka sorkar ban buh centre thungkam ka NEIGRIHMS ha Jylla

Syllad | The Rising MeghalayaDecember 16, 2023

Ka Khasi Students’ Union (KSU) haka 15 tarik Nohprah, ka la dawa ia ka jingtuklar ba mardor jong ka Myntri ka Tnat ka koit ka khiah ka Dr.Ampareen Lyngdoh halor ka jingujor kaba iadei bad centre thoh eksam shabar ka jylla Meghalaya na ka bynta ki nong aplai kiba dei ki trai shnong riewlum kata kiba iakhun ia ki kam Group B & C hapoh ka North Eastern Indira Gandhi Regional Institute of Health & Medical Sciences (NEIGRIHMS).

Na ka liang u General Secretary ka KSU u Samla Donald V Thabah u la ong ba ka Seng ka pyrshang ruh ban iakynduh ia ka Myntri ban iakren halor kane ka mat, hynrei kam shym la don ha kaba ki la ioh ban iakren tang lyngba ka phone. 

U la ong ruh ba na ka liang ka Myntri ka la pynthikna ba na ka liang jong ka ha ryngkat u Myntri Rangbah ka jylla u Conrad K Sangma kin rah ia kane ka mat sha New Delhi. Nalor kata ka la pynthikna ruh ba kin iakynduh ia ki heh ka Tnat ka koit ka khiah ka Sorkar Pdeng ban iakren halor kine ki jingeh bad ban kyrpad ba baroh ki trai shnong ka jylla ki dei ban ioh ia ki centre thoh eksam hapoh la ka jong ka jylla.

U Samla Thabah u la ong ba ka KSU ruh kan rah ia kane ka mat bad u CM na ka bynta ban un tuklar lem mardor. Nalor kata ka Seng kala thoh sha u Director ka NEIGRIHMS u Dr Nalin Mehta ban pynbeit halor kane ka jingeh ba ki samla ka jylla ki kynduh.

“Ha kane ka shithi ka Seng ka pynpaw ba kane ka jingbym ioh thoh eksam ki samla trai shnong hapoh ka Jylla la dei ban pynbeit noh mardor bad dei ban ailad ia ki samla ban thoh eksamin hapoh ka Meghalaya” la ong ka shithi sha u Dr. Nalin Mehta. Ha ka shithi ka seng ka pynkynmaw ba na ka liang u Dr Nalin Mehta ha ka jingiakynduh bad ki nongialam ka seng ula pyntip iaka jingpyniaid iaka eksm la aiti sha kawei ka Company HLL hynrei ki jaka thoh eksamin ki dei ha Shillong, Guwahati, Jorhat & Delhi.

“Ia ka HLL agency la jied halor ki kyndon kiba iadei bad ka jinglah ban pyniaid beit iaid ryntih ha kaba pynlong ia ki eksam. Hynrei, ka Seng kala jingujor ba don ki samla trai Jylla kiba hap ban leit thoh eksamin sha Dibrugarh ha ka17 bad 18 Nohprah bad la ioh jingtip ruh ba katkum ki jingpynbna laitkam, ki samla ki lah ban jied ia ka jaka thoh eksamin ha Shillong, Guwahati & New Delhi” ong ka KSU.

Nalor kata ka Seng ka la ong ruh ba ki don bun bah ki samla trai trai jylla kiba la jied ia ka Shillong bad iaka Guwahati kum ki jaka thoh eksamin hynrei ki ioh pynban sha Dibrugarh bad kane ka paw shai ka jingbym lah ka Company HLL ban pynbeit iala ka jingbakla kaba buh jingeh iaka lawei ki samla trai Jylla.

Shuh shuh ka Seng ka pynkynmaw ba bun ki samla kiba mut ban ialeh iaki eksamin ki dei na ki longïing ba duna iaka ioh ka kot ba ka jinghap leit thoh iaki eksamin sha bar Jylla ka buh jingeh bha ia ki. “Namar kane ka KSU ka ban jur ba dei ban pynbeit noh ia kane ka kynrum kynram katba kloi” ula ong.