Dawa tuklar ka NEHUNSA na u Myntri ka Sorkar Pdeng ban pynbeit ia ki kynrum kynram ha NEHU

Syllad | The Rising MeghalayaFebruary 14, 2025

Ka North Eastern Hill University Non-Teaching Staff Association (NEHUNSA) ka la dawa ia ka jingtuklar lem ba mardor jong u Myntri ka Tnad pule puthi ka Sorkar Pdeng u Dharmendra Pradhan khnang ban lah ban weng noh ia ki kynrum kynram kiba la sahteng hapoh ka skulbah NEHU.

Ha u kyrwoh ha ka 13 tarik Rymphang, u president ka NEHUNSA u Dr Wandondor Rynjah Synrem u la ong, “Da ka jingsngewkhia kaba jur halor ka jinglong jingman jong ka North-Eastern Hill University, ka NEHUNSA sa shisien pat ka la phah da ka jingthoh sha u Myntri ka Sorkar Pdeng ba un shim ia ki lad ki lynti khnang ban lah ban weng noh ia kine ki jingeh ha kane ka skulbah.”

“Ia ka North-Eastern Hill University la seng na ka bynta ban ai ia ka jinghikai ha ki kyrdan kiba shalor na ka bynta ki paidbah ka thain. Ka jingthmu ka long ban kyntiew ia ka thain abd ia ka rukom im bad ka ban lam sha ka jingkiew jong ka Jylla bad ia ka ri kumjuh,” u la ong.

U la pynpaw ruh ba ka University kam lah ban treikam khlem da don ia ki bor ba dei khmih kiba thikna bad ia ka jingtreikam ba man ka sngi hapoh ki ophis jong ka skulbah.

“Ki nongtrei ki bym dei ha ki kam hikai jong ka University ki don ia ka bynta kaba khraw ban pyniaid ia ki kam jong ka skulbah khamtam namar ki don ia ka bynta ha ka jingpdiang ia ki samla kiba wan pule, ban register ia ki samla pule, ban pynkhreh ia ki scholarship/ fellowship, ban pynlong ia ki eksamin bad kiwei kiwei.Ki kam ki jam kiba man la ka sngi jong ki nongtrei bad ki nonghikai ka dei ruh ka kam ba la pynbeit da ki nongtrei ki bym dei ki nonghikai,” ong u Dr Synrem.

“Hynrei, kumba la kdew ha ka shithi ba hashwa ka jong ngi, ka kam jong ki nongtrei ki bym dei ki nonghikai ka la hiar bha bad kaba la poi shaduh u pud ba ka la ktah ia ka jingtreikam kaba man la ka sngi jong ka skulbah. Ngi la kdew ruh ba la dep ban ai ia ka jingpynbna halor ki kam nonghikai kiba lait, hynrei ka la don pat ka jingsahteng ha ka jingthngkam,” u la bynrap.

Ka NEHUNSA kala kyntu ruh ia u Myntri ka Sorkar Pdeng ba un bthah ia u Acting Vice Chancellor ban pyndap noh ia kitei ki kam kiba thylli ha ka University.

“Une u Acting Vice-Chancellor um shym la bat ia kano kano ka kyrdan ha ka Executive Council meeting kaba long kaba kongsan bha na ka bynta ki jingpynbna laitkam. Kum ki dkhot kiba don ka jingsngewkhia, ngi kyrpad ba phin bthah ia u Acting Vice Chancellor ban leh ia kaba donkam khnang ban khanglad na ka jingnang pynsniew shuh shuh ia ki jingthmu katkum ba la seng ia kane ka University,” bynrap u Dr Synrem.