Dawa tuklar ka shnong Mukroh ia ka Sorkar Jylla halor ka jingwan kyntur pud ka KAAC

Syllad | The Rising MeghalayaDecember 4, 2024

Ka Dorbar Shnong Mukroh Pyllun ha ka 3 tarik Nohprah ka la kyntu ia ka sorkar Jylla ba kan tuklar lem halor ka jingkynnoh wan kyntur pud jong ka Karbi Anglong Autonomous Council (KAAC) sha u pud u sam jong ka shnong Mukroh kaba hap hapoh ka Laskein Block, West Jaintia Hills District.

Ka kynhun jong ki nongsynshar shnong ka la leit iakynduh bad aiti ruh ia ka dorkhat sha u Symbud Myntri Rangbah uba khmih ia ka Tnad Kam Pohiing u Bah Prestone Tynsong bad Symbud Myntri Rangbah uba khmih ia ka Tnad pynroi Sor u Bah Sniawbhalang Dhar ha kaba iadei bad kane ka phang.

U Chairman jong ka shnong u Bah Chilangki Phawa u la kynnoh ba ka KAAC ka la bteng ban kyntu shapoh u pud u sam jong ka shnong Mukroh.

“Katkum ka jingpynbna kaba 25 tarik Risaw 1968 ba la pynbna da ka ophis ka Jaintia Hills Autonomous District Council (JHADC), ki jaka jong ka shnong Mukroh ki hap shaduh ka Elaka Labang Nongphyllut / Block-I lane ka shnong Moikoilum. Hynrei ka sorkar Assam ka la kyntur sha kine ki jaka jong ka shnong Mukroh mynta lah kumba katto katne snem da kaba pynieng ruh ia ka Forest Beat House hapoh ka shnong Mukroh,” u la ong.

U la ong ba ki nongshong shnong ka Mukroh ki shaniah tylli ban ioh ia ki dieng thang na ka bynta ban shet ban tiew bad kiwei pat ki jingdonkam da kaba leit wad sha ki jaka khlaw jong ka shnong naduh ki por kiba la rim bah. Hynrei, mynta ki la hap ban pyrkhat arsien bad sheptieng ban leit wad dieng thang sha khlaw jong ka shnong namar ka jingwan kyntu pud ba dang shen ka KAAC. Ka KAAC ka la khang pyrshah ruh ia ki trai shnong ba kin leit wad dieng thang namar na ka liang ka KAAC ka la kam ba kane ka khlaw ha Mukroh ka dei ka jong ki, u la bynrap.

Nalor kata u Bah Phawa u la kynnoh ruh ba ha u bnai Risaw ba la dep ka KAAC ka la pom ia ki dieng na ka bynta ban shna ia ka surok ha Salang, Mukroh da ka jingthmu ban pynkylla kper slasha ia ka jaka, bad ka Dorbar Shnong Mukroh ka la shim ia kane ka jingleh ka KAAC kum ka kam wan kyntur pud jubor sha ki jaka jong ka shnong Mukroh. Halor kane ka jingwan shna surok beain hapoh ka thain la pyntip ruh sha ki bor District ka West Jaintia Hills.

“Watla ki bor District na West Jaintia Hills ki la leit jurip ia katei ka jaka bad pynsangeh ia ka jingpyntrei, hynrei u kontraktor um shym la burom ia ka ain bad bteng ia ka jingpyntrei mar ia mih noh u Magistrate na ka shnong Mukroh,” ong u Bah Phawa haba kyrpad ia ka sorkar Jylla ba kan pynbiang ia ki bor pahara kiba khlain khnang ban khanglad ia kine ki kam beain bad ban pynsangeh ia ka jingshna surok bad ia ka project kpe sla sha ha Salang, Mukroh da ka KAAC.