Dawa u Bah Hek na u Myntri ban pynrung noh ia ka Ktien Khasi bad Garo ha ka khyrnit ba phra

Syllad | The Rising MeghalayaJuly 9, 2024

U nongialam ka BJP uba dei ruh u Myntri sorkar u Bah AL Hek ha ka 8 tarik Naitung u la dawa lyngba u Myntri khynnah ka sorkar Pdeng u George Kurian ban pynrung noh ia ka ktien Khasi bad Garo ha ka khyrnit ba phra jong ka Riti synshar jong ka Ri.

Ia kane u Bah AL Hek u la pynpaw ha ka jingialang State Executive Meeting kaba nyngkong jong ka party hadien ka elekshon Lok Sabha hapoh ka headquarter ha Bivar Raod, Shillong ha ka jingiadon lang u Myntri khynnah ka sorkar pdeng u George Kurian, u president ka BJP ka jylla u Riman G Momin, u MLA ka BJP uba dei ruh u Chairman ka MTDC u Bah Sanbor Shullai lem bad ki nongialam ba hakhmat jong ka party bad kiwei kiwei.

Na ka liang u Bah Hek ha ka jingkren u ka kyntu ia ka sorkar Pdeng ba kan pynrung noh ia ka ktien Khasi bad Garo ha ka khyrnit ba phra jong ka Riti synshar Ri da kaba ong kane ka jingpynrung ia kine ki ktien kan pynurlong ia ka jingdawa kaba la slem bha jong ki paid nongshong shnong ka Jylla bad kan iarap shibun ia ki samla pule kiba don sha ki thain ba kyndong eh jong ka jylla.

Nalor kata ha kane ka jingialang la iakren ruh halor kiba bun ki jingthmu bad ki prokram bapher bapher kiba iadei bad ka roi ka par jong ka Jylla.

Ha kawei pat ka bynta na ka liang u George Kurian u la kren ha kaba iadei bad ki skhim bapher bpaher na ka bynta ka Meghalaya ia kaba la pynkhreh da ka sorkar pdeng hapoh ka jingialam jong u Myntri Rangbahduh ka Ri u Narendra Modi, kata kaba kynthup halor ka jingkyntiew bad pynbha shuh shuh ia ka kam ri jingri, ka kam ri dohkha bad kiwei kiwei ka ban lah ban kyntiew ia ka ioh ka kot jong ki paidbah nongshong shnong ka jylla.