Dawa u Dr Mukul da ka jingtohkit ba laitluid halor ka jingkynnoh pyndonkam ka NPP da ka pisa beain

Syllad | The Rising MeghalayaSeptember 10, 2024

U Nongialam ka Liang Pyrshah u Dr Mukul Sangma haka 9 tarik Nailur u la ban jur halor ka jingdawa ban pynlong da ka jingtohkit kaba laitluid ha kaba iadei bad ka jingkynnoh pyndonkam jong ka National People’s Party (NPP) kaba ialam ia ka sorkar da ka pisa beain lyngba u drok, ka jingtih dewiong beain bad lyngba ki kam kontrak.

Kane ka jingdawa u Dr Mukul ka dei kaba la pynshong nongrim halor ka jingkynnoh da u nongialam ka Congress uba dei ruh u MP barim u Bah Vincent H Pala ba ka NPP ka la pyndonkam da ka pisa beain ban behthong bad khring ia ki MLA na kiwei pat ki seng sain pyrthei. 

Haba kren sha ki lad pathai khubor, un u Myntri Rangbah barim u la ong, “Kino kino ki jingkynnoh ngim lah ban shu sngap jar. Ngam tharai ba ngin shu ia klet noh ia ki jingkynnoh namar ki la mih pyrthei. Kumta ka dei ban don da ka jingtohkit kaba laitluid haduh kaba kut khnang ban pynthikna ha lade ba hooid ki jingkynnoh kim long kiba shisha lane da kumwei pat na ka bynta ban iada ia ka bha ka miat jong ki paidbah bad ka jylla lem kumta kan sa long kamkai. Uno uno u lah ban shu kynnoh bad wat lada ki jingkynnoh ki long kiba shisha ruh ki lah ban lait.”

Haba kylli, u Mukul u la ong, “Kam pher hynrei ki sienjam ka jong ngi kan long kaba kham pher. Ka kamram jong nga ka long ban pynbor ia ka sorkar India na ka bynta ban thung da ka jingtohkit kaba luitluid. Nga kren shai halor kane ka bynta. Kaei kaba ki ong, kaei kaba kiwei pat ki ong bad kumno ki pyrshang ban iada ia lade kam don jingsngew na ka bynta jong nga, Ngan kyntu ia ka sorkar India ba kan thung da ka jingtohkit kaba laitluid.” 

Haba kdew halor ka jingjia kaba iadei bad ka jingkhyllem jong kawei ka jingkieng ha Rilum Garo ha ryngkat kawei ka trok kit shini, u la ong, “Kumta ruh mano ban tohkit ia kine kiei kiei baroh namar ki dei ki dei ki kam bymman ha shilynter ki jaka khappud jong ka ri.

Ki don shibun ki jingtip kiba nga la ioh pdiang kiba iadei bad ki kam bymman lyngba ki thain khappud jong ka ri. Ngi la don ha ka sorkar la slem bha ha ki kyrdan bapher bapher. Mynta lada kino kino ki kam beain ki jia ha kylleng ki thain khappud sngewbha long kiba thikna ba kam dei tang ha kawei ka kam hynrei kan long kham palat.” 

Nalor kata u la ong ruh ba ym don jaka ban shu sngewhun ha kaba iadei bad ki kam bymman ha ki thain khappud.     

“Sngewbha long husiar, ngi dei ka jylla kaba don hajan u pud u sam uba iar bad kawei pat ka ri, kumta ym don jaka ban sngewhun ha kaba iadei bad ka jingshimkhia jong ka sorkar India halor kino kino ki mat kiba iadei bad ki kam beain ha ki jaka khappud jong ka ri. Kim lah ban shu sngap jar lane ba ngan khmih lynti ba kin shu sngap jar.Nga khmih lynti ba kin shimkhia mardor bad nga don ia ki daw kiba biang ba ngeit,” u la bynrap.

Ther tyngeh u Dr Mukul ia ka Sorkar ba ialam da ka NPP namar ka jingkiew ka jingshim ram