Dawa u ma Andrew Shullai iaka bor district ban pyndonkam iaka bor ban ioh bret ñiut ha Mynkjai

Syllad | The Rising MeghalayaAugust 2, 2021

U MDC jong ka Jowai Central, u ma Awhai Andrew Shullai haka sngi Nyngkong ula dawa na u Deputy Commissioner, West Jaintia Hills District ban pyndonkam ia ka bor kaba la pynkup ha u ban iakhun pyrshah iaka jaboh jabaiñ khnang baka Jowai Municipal Board kan iohbiang ban leit bret ïaki ñiut sha ka jaka theh ñiut ha Mynkjai.

U Ma Andrew Shullai ula ai da ka dorkhat sha u Deputy Commissioner, West Jaintia Hills hadien bala phiel ka Jowai Municipal Board ban pynlang iaki ñiut kiba la lum thup ha ki iew ki hat ha sor Jowai kaba la wanrah ruh iaka jingsma iwtung.

“Kane ka jingphiel ka Jowai Municipal Board ban lum ñiut kadei hadien ba don ki katto katne kiba pyrshah iaka jingbret ñiut ha Mynkjai kaba la pyndkhoh ia ka rukom pynlang ñiut ka Municipal na Jowai,” la ong u Ma Andrew haka dorkhat kaba ula ai sha u DC.

U Ma Andrew ula pynkynmaw biang ruh iaka jingiakynduh jong u ia u DC ha ryngkat bad ki waheh shnong Jowai ha u Lber 26 tarik jong une u snem ban dawa na u ban pyndonkam iaka bor kum u khlieh synshar district ban ailad iaka JMB ban bteng iaka jingbret ñiut ha Mynkjai.

Ha kane ka jingialang U Andrew ula ong ba u DC ula ong ban khot jingialang hapdeng ka JMB bad kiwei kiwei ki tnad sorkar, pynban wat hadien saw bnai ym shym la lah ban pynbeit ia kane ka kam bret ñiut bad ym don kino kino ki dak ki shin ban ioh ia kata ka jaka bret ñiut thymmai.

“Kalong kaba sngewsih ba ki ñiut kila lang kylleng ka sor Jowai bad khamtam eh ha khmat ka DC ophis Jowai. Ka ophis u DC ruh kala lah ban bishar katno ka jinglang ki ñiut bad mutdur ha ki iing briew sa katno kin lang ki ñiut,” la ong u Andrew bad ula bynrap ba ha kum kane ka por ka saw ka sian naka jingiakhun iaka khlam COVID-19 ba dei ruh ban don iaki jaka bret ñiut ba paka ban iada na kiwei kiwei pat ki jingpang namar ka jingbym don jaka bret ñiut.

“Nga sngewthuh iaka jingwad jaka sorkar ban ioh iaka jaka pyllang niut, bad ngam iohi pat iaka resol,” la ong u ,ma Andrew bad pynkynmaw iaka jingiakut ka JHADC bad ka JMB na ka bynta 20 snem kaban kut haduh u snemj 2037 ban bret ñiut ha Mynkjai. Kumta ka donkam baka JHADC bad ka JMB kin leh katkum ka jingiakut khnang ban pynjem ia kane jingeh mar mar ha kaba iadei bad ka kam bret ñiut.

Shuh shuh ka Coordination Committee for Clean Iawmusiang haka jingialam u Ma Edystone Shylla kila kynduh ia u Deputy Commissioner bad ka jubab kaba ki ioh kalong ba kin dang hap iaka rai jong ki 6 shnong halor ban ioh theh ñiut ha Mynkjai na ka bynta shipor.

U Ma Edystone ula ong ba kala don ka jingialang hadpeng u DC, u Myntri Pynroi Sor, ma Sniawbhalang Dhar, MLA Jowai Wailadmiki Shylla bad ki 6 shnong halor kane ka kam bret ñiut ha Mynkjai.