Dawa u MLA Jirang ban pyllait mardor ia u rangbah ba shah kem ha ka Tnat Forest ka Assam

Syllad | The Rising MeghalayaJuly 6, 2024

U MLA ka Jirang constituency ha ka 5 tarik Naitung u la dawa na ka Tnat Forest ka Assam ba ka dei ban pyllait noh mardor ia u nongshong shnong  jong ka shnong Belahari kaba don ha ka thain khappud ka Meghalaya bad Assam ha Ri Bhoi District hadien ba u la shah kem noh ha ki briew jong kane ka tnad khnang ba kan ym ktah ia ka shongsuk shongshngain hapdeng ki nongshong shnong ka thain khappud.

Ka jingshah kem noh jong une u rangbah uba kyrteng u Bah Bakstar Deingdoh ka long kumba shah pynap shrip ha ka Tnat Forest ka Assam, kata hadien ba ka la khot iakren ia u sha ka ophis treikam jong ka, hynrei hadien ba u la poi sha katei ka jaka ki briew jong kane ka Tnat ki la kem pynban ia u da kaba pynngat ha ki kyndon bapher bapher.

Na ka liang u MLA ka Jirang u Bah Sosthenes Sohtun haba kren sha ki lad pathai khubor u la ong ba kum u nongmihkhmat jong ka thain u pynpaw ka jingsngewkhia bad pyrshah jur ia kane ka kam leh donbor jong ka Tnat Forest ka Assam kaba la kem khlem nongrim ia u nongshong shnong jong ka thain. U la ong ruh ba kane ka pynpaw ia ka jingbym burom markylliang  jong ka Tnat Forest ka Assam watla ka jingpynbeit pud ka dang iaid shakhmat hapdeng ka Meghalaya bad Assam.

U la ong ruh ba kane ka jingleh donbor ka dei ka bym lah ban pdiang bad kan wanrah ruh ia ka kynrum kynram bad ktah ia ka shongsuk shongshngain jong ki paidbah ha ki thain khappud. Kumta u la dawa na kane ka Tnat Forest ba ka dei ban pyllait noh mardor ia une u rangbah khlem da pynngat ha kino kino ki kyndon ain.

Halor kane ka jingjia u MLA u la ong ba u la dep ruh ban iakren bad u Myntri Rangbah ka Jylla u Conrad K Sangma kumjuh bad ki bor sorkar ba dei khmih ba kin iakren bad ka sorkar Assam na ka bynta ban pyllait noh mardor ia une u rangbah khlem kano kano ka jingteh kyndon.

Shuh shuh u la kyrpad ruh ia ka sorkar Assam ba ka dei ban pyllait noh ia une u rangbah khnang ba kan ym ktah ia ka suk ka san jong ki paidbah kiba shong ba sah ha kane ka thain khappud.