Dawa u muktiar na ka JHADC ban pyndam iaka NOC karkhana dewbilat ba thymmai ha Wahiajer Narpuh

Syllad | The Rising MeghalayaAugust 17, 2024

U wei na ki Muktiar na East Jaintia Hills District, u Bah Kynjaimon Amse u la dawa na ka Jaintia Hills Autonomous District Council (JHADC) ban kan pyndam mardor ïa ka No Objection Certificate (NOC) kaba la ai sha kawei na ki karkhana kaba thymmai – M/s Meghatop Cement Private Limited (MCPL) kaba la ai khlem ka jingmynjur jong ka Dorbar Elaka Narpuh bad ula byrthen ruh ban shim iaka sienjam ban iaid da ka lynti jong ka aiñ ban pyndam ïa kane ka NOC.

Ha ka shithi ba la phah sha u Chief Forest Officer, Jaintia Hills Autonomous District Council (JHADC) ha haka 16 tarik Nailar, u Bah Amse u la ong ba ka NOC kaba la ai da ka JHADC sha ka Meghatop Cement katkum No. JHADC/FOR/39/2022 Dated Jowai ka 3 tarik Naitung 2023 ban pynmih dewbilat haduh 3 million Ton bad 50 MW Captive Power Plant WHRS system bad captives Mines na ka bynta ka Cement plant ha Wahiajer, Elaka Narpuh, East Jaintia Hills District ka dei kaba la ai khlem da bud ryntih ïa ki kyndon.

U la ong ruh watla ka JHADC kam lah satia ban ai NOC sha kano kano ka company ban seng ïa ka cement plant hapoh Elaka Narpuh, katkum ka jubab RTI kaba ula ioh, pynban kaba thamula ka konsil kala ai iaka NOC ka jingmynjur ka Dorbar Elaka Narpuh.

U Bah Amse u la ong ba katkum ki jubab ba la ïoh na ka JHADC, la pynpaw ba ka NOC kaba la ïoh kane ka company na ka Dorbar Elaka/ Dalloi, Elaka Narpuh na ka bynta ka M/s Megha Top Cement Private Ltd ka dei tang ka provisional NOC, hynrei na kaliang ka JHADC kala ai syndon da ka NOC na ka bynta ka M/s Megha Top Cement Private Ltd ban tei ïa ka cement plant ha Wahiajer, Elaka Narpuh.

U Bah Amse u la pyntip ba ka Provisional NOC la ai da ka Dolloi, Elaka Narpuh ha ka 3 tarik Naiwieng 2022 bad u la ong ba ka NOC ka ong “Kane ka dei ban pynshisha ba ka No Objection Certificate na ka bynta ban tei ïa ka Cement Plant da ka Meghatop Cement Private Limited ha Narpuh Village ka dang don haka jingbishar ka Dorbar Elaka Narpuh. Nga pynthikna ba ka NOC yn ai tang lada ka Dorbar Elaka ka ai iaka jingmynjur.”

U la kdew ba ia ka Provisional NOC ym lah satia ban khein kum ka NOC namar ka dei tang ka jingkular na u Dolloi bad kam don ka jingpynshisha ba ka Dorbar Elaka Narpuh ne u Dolloi kila ai NOC sha ka MCPL na ka bynta ban tei ïa ka cement plant hapoh Elaka Narpuh. U Amse ula buh kylli ruh kumno ka JHADC ka lah ban khein ïa kum kata ka kot ka NOC bad ka la ïaid shakhmat ban ai NOC sha ka MCPL. U la bynrap ruh “ne ka M/s Meghatop Cement Private Ltd ka la ialam bakla ïa ka JHADC ne ka Forest Department ka JHADC kala leh bym salia halor kane ka kot ba la ai da u Dolloi Elaka Narpuh.”

U la pynkynmaw ba ka kamram ka JHADC ka dei ban ïada ïa ki hok jong ki trai ri trai muluk bad kam dei na ka bynta ka jingmyntoi jong ka company bad ban ai NOC khlem da shim ïa ka jingmynjur jong ki nongshong shnong bad khlem pyrkhat ïa ka miat ka bha jong ki paidbah.

U Bah Amse u la ong, “katkum ka rukom bad ruh ka aiñ pyniaid Elaka jong ngi, ba iaka NOC ym lah ban ai sha kano kano ka company bad ba ym don mano mano ba lah ban tei ïa ka karkhna hapoh Elaka Narpuh khlem ka jingmynjur jong ka Dorbar Elaka Narpuh, hynrei ha kane ka bynta ka JHADC ka la ai NOC sha ka kane ka company da kaba beain khlem ka NOC na ka Dorbar Elaka Narpuh.” U la ong ruh ba khlem ka NOC na ka Dorbar Elaka Narpuh, ka NOC ba la ai da ka JHADC na ka bynta ka M/s Meghatop Cement Private Ltd ka long kaba iap naduh ba sdang, ka bym treikam bad kaba beain.