Dawa u Mukul Sangma ban thung jingtohkit ha baroh ki district bad sympat iaki briew kiba donkti tih dewiong beaiñ

Syllad | The Rising MeghalayaJune 1, 2021

Hadien ka jingjia suba iap da kaba shah btep im ki nongbylla tih dewiong ha Krem Ule, Umpleng kaba hap hapoh ka Umpleng Anti Dacoity Camp, East Jaintia Hills District, u Dr Mukul Sangma u nongialam ka liang pyrshah ula dawa naka sorkar ban thung iaka jingtohkit ba laitluid ha baroh ki district haka jingjylla halor kam tih dewiong beaiñ bad ban sympat iaki briew kiba donkti da kaba pynshitom katkum ki kyndon jong ka aiñ.

Kane ka jingjia shah sahkut ki nongtrei bylla tih dewiong shapoh krem kiba don haduh 5-6 ngut kala jia naduh ka 30 tarik u Jymmang 2021. Halor kane ka bor synshar district East Jaintia Hills District kala thung ia u ADM M.S. Sangma ban tohkit (Magisterial inquiry). Une u magistor Lula wer ia kino kno kiba don jingtip halor kane ka jingjia ban wanmih sha u ha ophis u Deputy Commissioner, Khliehriat haka por 11:00 AM haduh 3:00 PM shuwa ka 8 tarik u Jylliew bad yn buhrieh ruh ia ki kyrteng jong ki nongiathuh halor kane ka jingjia.

“Kane ka kam tih dewiong beaiñ kan nym jia lymda don ki briew kiba donbor kiba donkti ha kane ka kam, hynrei namar baka sorkar ka kyntait ban pdiang iaka jingiaid ka kam tih dewiong beaiñ ha Jylla kala wanrah ka jingduhnong bad lait rud ka pisa shabar ka iarong ka pla ka sorkar,” la ong u Dr Mukul Sangma haba kren bad ki nongthoh haka jingwan jurip iaka West Jaintia Hills District halor ka jingpynkhreh ban iakhun iaka khlam COVID-19.

Ula ong ruh kane ka jingiaid ka kam tih dewiong kala wanrah ruh ka jingduh nong iaki konsil kiba dei ban ioh ka bhah khajna na ki mar pohkhydew ban pyniaid shakhmat iaki kam ka konsil.

“Ka kam pyrshah iaka aiñ ka jia haduh katne namar ba donkti lang ki briew kiba don haka bor bad ia kane ka kam ym lah ban pyndonkam tang da u mowkhiew ne ka belsha hynrei da ki kor ki bor, kumta balei ki briew kiba bat iaka aiñ kim iohi iaka jingiaid ka jingtih dewiong,” la kynthoh u Dr. Mukul Sangma

“Ka jylla jong ngi kam dei kaba heh haduh katta katta bad la pynkha bun tylli ki district ban don bun ki ophisar kiba don ka khmat bad ki shkor ban iohi ne sngap thuh ia kino kino ki kam beaiñ bad ban khanglad iaki kam beañ, phewse ba aili ka sorkar kine kiei kiei ki kam beaiñ ki iaid shakhmat,” la ong u Dr Mukul bad bynrap ba un pynthikna ba ka sorkar kan thung iaka jingtohkit halor ka kam tih dewiong ban sympat bad ban pynshitom ia baroh kiba donkti.

Haduh bala thoh iaka khubor ym pat lah ban sei iano iano na katei ka krem.