Dawa weng ia ka khyrdop lum pisa beain ka Assam ha Jorabat ba ktah ia ka shongsuk shongshngain

Syllad | The Rising MeghalayaOctober 5, 2024

Ka jingiai mih ki jingpynthut ia ka shongsuk shongshngaiñ ha ka iaid ka ieng bad ka leit ka wan jong ki riew paidbah khamtam ha ka por mynmiet ha ki jaka ba la kynnoh ba ju shong kita ki nongkhrong pisa beaiñ kiba na Assam (Syndicates) kiba ju khrong pisa na ki kali kit mar mata, ha ka 4 tarik Risaw ki nongialam shnong ka Mawsmai 11 Mer, ki la dawa ba dei ban weng noh mardor ia ka khyrdop lum pisa beain ba ju shong kine ki kynhun ha ka thaiñ Jorabat.

Kane  ka jingmih paidbah ryngkat ki nongialam shnong ka Mawsmai 11 Mer ban dawa weng ia kane ka jaka lum pisa beain ka dei ruh hadien ka jingjia shah shoh shah pynmynsaw jong ki katto katne ngut ki samla na katei ka shnong ha ki riew shim kabu kiba la kynnoh ba ki dei kita ki nongkhrong pisa beaiñ na Assam kaba la jia ha ka miet jong ka 2 tarik Risaw ha Jorabat, ha kaba ki briew na Assam kiba la buaid tanglang bad ki la pyndonkam ruh da ki bitor kiad ban tied ban bom ia ki samla kiba la mynsaw na ki bynta ka dur khmat bad kpoh.

Hadien kane ka jingjia, ki nongialam shnong ka Mawsmai 11 Mer, hapoh ka jingialam u Bah Petrus Shakwa lem bad ki nongshong shnong ba la synranlang ruh da ki nongialam ka FKJGP, Byrnihat Circle ki la pynlong ia ka jingialang ha Jorabat bad dawa ba dei ban weng noh ia ka khyrdop ba ju pyndonkam da ki kynhun ki briew kiba don iaka juh ka thong ne syndicate ban khrong pisa na ki kali kaba dang hap hapoh ka jaka jong ka Meghalaya da kaba kynnoh ruh ba ki ju ia treilang bad ki bor pulit ka Assam ha Jorabat.

Na ka liang kawei ka longkmie ka la mih shakhmat ban pynrem ia katei ka kynhun jong ki nonglum pisa beaiñ kiba ju pyndik ia ka leit ka wan ki paidbah khamtam da ki la ia shongshit kiad ha ki por mynmiet kaba la pynshong syier ruh khamtam ia ki longkmie, ki khyllung khynnah kiba ju iaid ju ieng lyngba katei ka jaka ha Jorabat.

Shuh shuh hadien katei ka jingialang la shim ruh ia ka rai ban ujor sha u Deputy Commissioner ka Ri Bhoi District bad ban dawa weng noh ia ka khyrdop kaba ju pyndonkam da ki briew kiba na Assam da kaba pynieng ha ka jaka jong ka Meghalaya khnang ba kum kine ki briew kin ym lah ban pyndonkam shuh bad ban pynthut ia ka shongsuk shongshngain.