Dei ban pynduh noh iaka Reservation Policy ong u Wailadmiki Shylla

Syllad | The Rising MeghalayaApril 22, 2023

Hadien baka jylla baroh kawei kala khih kyan naka jingdawa ban pynkylla thymmai iaka Reservation Policy ne ka bhah thungkam thungjam bad ka Roster System ne jingpynbeit ryntih iaka thungkam katkum ka bhah thungkam, u MLA ka Jowai u Wailadmiki Shylla ula ong ba dei ban pynduh noh iaka Reservation Policy bad pyntreikam da ka 80 percent ia baroh u Khasi-Jaintia bad Garo.

U Wailadmiki ula ong ia kane haka jingialang plie iaka jaka hikai suh jain ha Mynthong, Jowai haka sngi Thohdieng. Kane ka jaka suh jain ka dei kaba pyniaid da ka Northeast Institute of Professional Studies (NeIPS), Nongstoiñ. La kyrshan ia kane ka jaka ai jinghikai da ka ka Skills Meghalaya bad ka DAY-NULM (Deendayal Antyoday Yojana National Urban Livelihoods Mission).

Une u MLA ka Jowai haba kren shuh shuh ula ong ba nakaliang jong u sngewban ong ba lada un ioh ban iakren ha iing dorbar ruh un ieng haka nongrim ban pynduh noh iaka Reservation Policy.

Ula ong ruh ba kala don ka rai jong ka iing dorbar ba hakhliehduh ka ri Supreme Court ba ka bhah iohkam iohjam naka bynta kano kano ka jaidbynriew kam dei ban palat iaka 50 percent. Ula ong ba lada bakla ban pynkylla iaka Reservation Policy kan buh jingeh iaka Roster System bad ngi lah ban duh iaka 80 percent kata Khasi Jaintia 40 percent bad Garo 40 percent

Ula Wailadmiki ula ong ba kam dei kaba suk ban kylla thymmai iaka Reservation bad u la ong ba lada lah ban pynkylla thymmai kam dei shuh ban mih kino kino ki jnit ki jnat bad kadei kaban long ain kaba pura ban bit ban biang lang baroh salonsar.

Ula ong ba nakaliang jong u, u sngew ban ong kaba biang kalong ban pynduh noh iaka reservation bad ai baroh Khasi Jaintia bad Garo un iakhun 80 percent bad uba tbit un ioh iaka kam.