Dei ban pynshitom ia ka Dhar Construction Company lada lap ba donkti ha ka kam bamsap: AL Hek

Syllad | The Rising MeghalayaNovember 9, 2023

U nongialam ka Seng BJP uba dei ruh u Myntri ka Cabinet u Bah AL Hek haka sngi Balang u la ong ba dei ban shim ia ki lad jingpynshitom pyrshah ia ka Dhar Construction Company lada lap ba ki donkti ha ka kam bamsap ha kaba pyntrei ia ka lynti surok ba kongsan hapoh ka jylla.

Na ka liang u Bah Hek u la ong ba u kwah ia ka sorkar kaba lait na ki kam bamsap. “Lada ka jingpwad RTI ka pynshisha halor ka jingdon jong ki kam bamsap, na ka liang ka sorkar kata ym tang ka Sorkar Pdeng hynrei ka Sorkar Jylla ka dei ban shim ka jingpynshitom pyrshah ia kiba donkti,” ong u Bah Hek da kaba bynrap ruh ba na ka liang ka sorkar kan shim ia la ka jong ka rai ha kaba iadei bad kane ka bynta.

Na ka liang ka JAC kaba kynthup ia ki nongialam shnong jong ka War Jaintia Hills bad ka Seng  Hynniewtrep Youth Council (HYC) ki la byrthen ban ujor da ka PIL sha ka iingbishar Meghalaya High Court halor ka jingkynnoh ba ka la don ka kam bamsap ha kaba iadei bad ka jingshna ia ka surok Dawki-Amlarem-Jowai ne ka surok NH 206 ia kaba la mang da ka Sorkar Pdeng haduh T. 43 klur.

Ka jingshna ia kane ka surok la mang da ka Tnat Roads Transport and Highways ha ka jinglut kaba T.43 klur. Ia kane ka kam la aiti ban pyntrei sha ka Dhar Construction Company ha ka 9 tarik u Nailur 2022 bad ka jingpyntrei ia kane ka surok la lah ban pyndep hapoh ka 12 bnai.

Hynrei, ar bnai hadien ba la pyndep kane ka surok la shem ba ka la sdang ban julor bad tor noh, kynnoh ka JAC. Kumta kane ka la pynlong ia ka JAC ba kan dawa na ka sorkar ba kan blacklist ne pynngat dak iong ia ka Dhar Construction Company.