Dei ban tohkit ia u CM ka jylla halor ka jingkynnoh don jingiadei bad u snar khaii drok: KHNAM

Syllad | The Rising MeghalayaSeptember 20, 2023

Ka Khun Hynniewtrep National Awakening Movement (KHNAM) haka sngi ba Ar ka la dawa ban pynlong ka jingtohkit pyrshah ia u Myntri Rangbah ka jylla u Conrad K Sangma halor ka jingshah kynnoh donkti bad u snar khaii drok na ka jylla Mizoram.

Kane ka jingdawa ka la wan long hadien ka jingkynnoh da u nongialam ka liang pyrshah AITC uba dei ruh u Myntri Rangbah barim ka jylla u Mukul Sangka hapoh ka iingdorbar Assembly haka sngi ba Ar. 

Na ka liang u Mukul Sangma u la pyni ruh ia ka dur jong u Conrad, ka kurim jong u bad u Henry Lalremsanga uba la shah kem noh ha ka 23 tarik u Iaiong 2013 halor ka jingioh kurup ia u drok pseudoephedrine tablet ba la khein beain uba shongdor haduh hynriew klur tyngka.

“Kane ka jingpynpaw hynne ka sngi ha ka dorbar Synrai halor ka jingdonkti u CM jong ngi bad u snar nongkhaii drok ka buh ia ka jingkylli halor kane ka mat, bad katkum ka ain u CM ruh u dei ban ngat ha ka jingshah tohkit katkum katkum ki kyndon ain bad na ka bynta ka jingshngain jong ki nongshong shnong,” ong u working president ka KHNAM u Bah Thomas Passah.

Nalor kata ka KHNAM ka la dawa ruh ba ka jingpynjulor noh ia u drok ba la ioh kurup da ki bor pulit ka jylla dei ban leh bad pyndep hakhmat ka jingsakhi lang da ki lad pathai khubor na ka bynta ka jingpynshisha kaba khuid.

Na ka liang u Bah Passah u la ong ruh ba kawei na ki jingkylli hapdeng ki riew paidbah ba bun balang ka long ha kaba iadei bad ka jingpynduh noh ia ki drok bad kiwei pat ki jait jingdih ba beain ba la ioh kurup ha ka jylla Meghalaya.

Shuh shuh une u nongialam ka KHNAM u la ong ruh; “Ban pynthikna ban lah ban rat dyngkhong ia u drok na kane ka jylla, ka sorkar jylla ka dei ban ai ka jingiatreilang bad ki paidbah, bad ban pynurlong ia kane ki paidbah ki donkam shwa ban ioh ia ka jingshaniah na ka sorkar.Kumta ngi ai jingmut da ka jingsngewkhia ba ka jingpynduh noh ia kiba kum kine ki jait jingdih dei ban bud beit ryntih katkum ki kyndon ain bad hakhmat jong ki lad pathai khubor na ka bynta ban ioh ia ka jingshaniah.”