Dei ka Sorkar ba la ialam da ka NPP kaba la rai shlur ban pynbeit ia ka kam iakajia pud bad ka Assam: Gavin

Syllad | The Rising MeghalayaFebruary 10, 2025

U MLA ka Sohra u Bah Gavin M Mylliem u la ong ba dei tang ka Sorkar ba la ialam da ka National People’s Party (NPP) kaba nud ban shim ia ka rai kaba shlur na ka bynta ban pynbeit ia ka kam iakajia pud kaba la slem bah bad ka Assam.

“Kane ka dei ka mat kaba la sahteng naduh ba ka Meghalaya ka la ioh ia la ka jong ka jylla, hynrei hadien kane dei tang kane ka sorkar ba la ialam da ka NPP kaba la shim ia ka rai kaba shlur ban lah ban pynbeit ia ki 6 na ki 12 tylli ki jaka kiba don hapdeng ka jingiakajia pud bad ka Assam,” ong u Bah Gavin haba kren ha ka jingialang ialap elekshon ban pan jingkyrshan ia u kyrtong ka party na Langkyrdem-Laitkroh u Bah Rahboklang Tynsong ha Laitlyngkot-Nongkynrih ha ka 8 tarik Rymphang.

U la ong ba ka sorkar Jylla ka la thaw ia ki Regional Committee bapher bapher ban wad ia ki lad ki lynti khnang ban lah ban weng noh kham kloi ia ki jingeh na ka jingiakjia pud bad ka Assam.

“Ngi sngewkmen ba ngi la pyndep ia ka jingiasoi MoU na ka bynta ki hynriew tylli ki jaka iakajia ba la lah ban pynbeit ia kaba la ia soi hapdeng u CM ka Meghalaya bad ka Assam ha ka jingiadon lang u Myntri Kam Pohiing ka Sorkar Pdeng u Amit Shah ha ka 29 tarik Lber 2022 ha New Delhi,” u la ong.

“Ngim lah ruh ban kyntait ia ka jingshisha ba kin don ki jingioh nong bad jingduh nong, hynrei kaei kaba kham kongsan ka long ba ngi la pyrshang ban shim ia ka rai ban pynbeit ia ka jingeh ban pynthikna ia ka jingsuk kaba neh ha ki thain khappud,” bynrap u bah Gavin.

Nalor kata une u MLA ka Sohra u la ong ruh ba kane ka sorkar ba mynta ka la phaikhmat kyrpang ruh ban kyntiew ha ka liang ka pule puthi.

“Watla ngi la iakynduh ia ka jingeh kaba khraw halor kane ka bynta hynrei ka sorkar Jylla ka la shim ia kiba bun ki sienjam ban pynbeit ryntih bad ban kyntiew ia ka puthi puthi,” u la ong da kaba bynrap, “Ha kaba iadei bad ki kam nonghikai kiba sah thylli ha ki skul sorkar mynta la bun bun snem namar ka mukotduma hapoh ka iingkashari, hynrei dei kane ka sorkar kaba la kyrpad hakhmat ka iingkashari High Court ha kaba na ka liang ka iingkashari  ka la shah ban pyndap kine ki kam kiba lait. Halor kane ha u snem 2021, ngi la sakhi ba da ki hajar tylli ki kam nonghikai la pyndap bad kane ka la long da shisha ka jingkyrkhu kaba khraw na ka bynta ki khynnah pule kumjuh ia ki samla khlem kam khlem jam.”

Shuh shuh u la kyntu ruh ia ki paidbah ba kin ai ka jingkyrshan kaba pura ia u kyrtong jong ka party bad ong ba ka Executive Committee ba la ialam da ka NPP ha KHADC ka la mynjur ia kiba buntylli ki Bill kiba kongsan na ka bynta ban iada ia ki trai ri trai muluk kaba pyni ruh ia ka jingangnud jong ka party ban shakri ia u paidbah bad ia ka thain hi baroh kawei.