Deilang ka Marathon da pyndep yei leh burom ya ka 14th National Voters Day ha Khliehriat

Syllad | The Rising MeghalayaJanuary 26, 2024

Kam wa man ha kiwi ki District ka yung krehkam u District Election Officer, East Jaintia Hills leh haka 25tarik Duiatra da pynman ko i leh burom ya ka 14^th National Voters Day dei wa pynman ya ka Marathon wa kiwi ki prokram wapher.

Ha ka yalang wa kyrpang wa da pynman ha Conference Hall ka yung krehkam u District Election Officer, East Jaintia Hills da emlang leh u Abhalash Baranwal, IAS Deputy Commissioner, East Jaintia Hills District, ki ar ngut ki Additional Deputy Commissioners, G Warjri waka JU Kharpuri, Assistant Commissioner ka F Wann, ki heh Sorkar na kiwi ki tnat krehkam, ki Waheh Chnong, ki khynnah skur wa kiwi kiwi.

U A Banranwal, IAS Deputy Commissioner hei e ki kyntien yahkhmat da khana pysniaw u ya ki nongrim iong ka National Voters Day dei wa klam batai kyrpang ya ki nongrim iong ka Synchar Paidbah hapoh ka Ri India ha ka thong wow e i Hok wa salonsar ya waroh khlem da wanrah i yapher iong i ngeit niam, ki rukom, dustur wa i kyrdan longbru manbru.

Chooh chooh da khut u leh ya ki khynroo khyllood kiwa dang kynjooh yei rta wa 18 snem wei ki wow man ki nongyachimbynta wa thyme ha ka Elekshon M.P. wa daw man wow yachimbynta ki ha ka Elekshon kam ki nongchongchnong kiwa em ka jingkitkhlieh neibynta i miat i bha ka imlang sahlang wei roi i par ka chnong ka thaw.

Neiliang u G. Warjri, Additional Deputy Commissioner, East Jaintia Hills ha kani ka yalang da klam khana u chaphang ki nongrim iong ka National Voters Day, katwa ka JU Kharpuri, Additional Deputy Commissioner da yahkhmat ko hei wow purae ya ka Pledge iong ka National Voters Day hei chimbyntalang da waroh kiwa sakhilang ya kani ka prokram.

Ka yung krehkam u District Election Officer, East Jaintia Hills ha kani ka prokram da pynkup burom ko leh ya ki Best Booth Level Officers iong ka 5 Sutnga-Saipung wa ka 6 Khliehriat Constituencies neitae i ekti leh ya ki EPIC cha ki khynroo khyllood ki wow man ki nongyachimbynta wa thyme ha ka Elekshon MP kawa daw man ha ki kajika bnai iog u snem 2024.

Ha ka yakop phet Surok nae Marathon hei jngai wa 11 KM kawa da pynman dei yakrehlang ka yung krehkam u District Election Officer, East Jaintia Hills wa ka yung krehkam u DSO, East Jaintia Hills wei kawa da kaweh lama da u G.Warjri, ADC- East Jaintia Hills na pchem ka yung krehkam u Deputy Commissioner dei walai lyngba ka Rymbai PHC wei pynkut wan ha Old Deputy Commissioner Office.

Heiliang ki chynrang dajop ya kani ka yakop phet da u Knerlang Phawa bood ryngkhi u Rishanmehi Ryngkhlem wa u Sting Phawa katwa heiliang wan ki kynthai ka Rosi Sana boodryngkhi ka Wasaki Phawa wa ka Rikynti Sana.