Dep pyntbit 52 ngut ki samla ban die jingbam ha Jowai

Syllad | The Rising MeghalayaJune 10, 2023

Ka Greta Solutions Training Academy ka la sam da ki tiar shet tiar tiew sha ki 52 ngut ki samla kiba la pyndep ïaki jinghikai pyntbit haka kam die jingdie bam kaba la tip kum ka Street Food Vendors-Standalone kum shi bynta ban pynshlur ïaki ban ïeng ha la ki kjat ban seng kam lajong.

Ïa kane ka jingai jinghikai la kyrshan da ka Meghalaya State Skills Development Society (MSSDS) ryngkat ka jingïatreilang ka IQAC jong ka Kiang Nangbah Government College Jowai kaba la sdang naduh ka 6 tarik Risaw 2022 haduh 6 tarik Kyllalyngkot 2023.

Ïa kine ki tiar shet tiar tiew la sam haka sngi Thohdieng da u kongsan u MLA ka Jowai u Wailadmiki Shylla haka jingdonlang u MDC JHADC u Octomewot Lamin, ka Kong DV Lyngdoh Additional Deputy Commissioner West Jaintia Hills District, ka principal jong ka Kiang Nangbah Government College ka Dr. EM Blah bad kiwei kiwei haka jingïalang kaba la long ha Multi-purpose hall ka Kiang Nangbah Govt’s College Jowai.

U Wailadmiki Shylla haka jingkren ula kyntu ïaki samla ba kim dei ban ap khmih lynti tang ïaki kam sorkar hynrei dei ban long ki samla kiba lah ban thaw kam ruh na lade lyngba ki sap ba la dep hikai khnang ba kan long ka jingkyrkhu ïa kiwei pat.

Ula kyntu ïaki samla ba kidei ban pyndonkam hok ïaka sap kaba kila dep shah pyntbit namar kan long ka jingkyrkhu ïaka lawei jong ki.

Kiwei de kiba la ai jingkren ki long ka Kong DV. Lyngdoh ADC, u Lambormi Suchen Skills Development Officer, West Jaintia Hills District, u Dasan Warlaitham Coordinator ka Greta Solutions Training Academy, u Golden Dkhar Skill incharge Kiang Nangbah Government College haka jingïalang la pynïaid da u Sonjoy Shylla Centre Head.