Dep pyntbit haduh 200 ngut kum ki misteri, sam tiar trei u Chairman JHADC

Syllad | The Rising MeghalayaJanuary 8, 2025

Ka Northeast Institute of Professional Studies, ka shlem ai jinghikai seng kam lajong khlem jingsiew, ha ka 21^st Nohprah, 2024 ka la lah ban ai ïa ka Certificate bad ka Start up tools ïa ki 200 ngut nongshah hikai (trainees) na kylleng ki shnong ki hap hapoh East Jaintia Hills kiba la pyndep iaka jingshah hikai pyntbit haka sap misteri, kane ka jingai jinghikai pyntbit ka dei kaba la tip kum ka Rural Masonry Program kaba la neh 3 bnai lynter ba la kyrshan da ka Meghalaya State Skills Development Society (MSSDS)

Ha kane ka sngi la wan ban don lang naduh u MDC jong ka Bataw – Lakadong Constituency Dr. Sankey Shangpung uba long ruh Chairman ka JHADC, Jowai kum u Kongsan ha ryngkat u Ma Boimi Dkhar ba long ruh u Skill Development Officer (SDO) jong ka Meghalaya State Skill Development Society kum u Symbud Kongsan lem bad ki samla nongshah hikai (trainees) jong ka NeIPS.

Ha kane ka sngi la sam ruh ïa ki tiar seng kam lajong sha ki rangbah bad ki samla kiba la pyndep ïa ka jingshah hikai khnang ba kin lah ban sdang ne seng noh ïa ki kam lade.

Ha kane jingïalang la ïoh ruh ka jingkren na u Bah Michael Thongni, Managing Director bad Chief Executive Officer, NeIPS, u Ma Boimi Dkhar, SDO jong ka MSSDS, bad u Dr. Sankey Shangpung Chairman ka JHADC, Jowai.