Dep shah hikai pyntbit 48 ngut ki samla haka Street Vendors- Standalone ha West Jaintia Hills

Syllad | The Rising MeghalayaDecember 16, 2022

Ka Greta Solution Training Academy, Jowai kala pynkut noh iaka jingai jinghikai Street Vendors-Standalone ne ki nongdie jingdie harud surok kaba kyrshan da ka Meghalaya State Skills Development Society (MSSDS), Shillong ha ryngkat ka jingiatrei lang bad ka Skill Development Cell ka Kiang Nangbah Government College Jowai haka sngi Thohdieng haka prokram pynburom ha Multi-purpose hall ka Kiang Nangbah Govt’s College Jowai.

Ia kane ka programme la pyniaid da u Sonjoy Shylla, Centre Head jong ka Greta Solution Training Academy, Jowai.

Hakane ka sngi la don bynta lang ka Dr. E.M Blah Principal Ka Kiang Nangbah Govt College, kum ka Kongsan ryngkat bad u Skill Development Officer, West Jaintia Hills District Lambormi Suchen.

U Skill Development Officer, Lambormi Suchen ula iathuh iaki jingmyntoi ba ioh na Skill Meghalaya Project jong ka Sorkar. Ka skill Meghalaya da ka jingiatreilang bad ki sengtreimon sngewbha ki ai iaki training bapher bapher na bynta ki khun samla kiba don ka jingthmu ban seng kam lajong bad kumjuh ban trei ha ki Fast-food, Restaurant, Hotel ynda kila dep pyntbit ialade lyngba kane ka Skill Training.

Ka Principal ka Kiang Nangbah Govt’s College kala pynshlur iaki khun samla ban trei shitom bad ban nym niewpoh iaka kano kano ka jait kam kaba ki trei  namar wat haka pule puthi ruh ngi dei ban ai kabha bhatam khnang ba ngin long ki nongjop.

Lah ioh ruh ka khubor jingjop na ka Hestis Phawa bad ka Russian Melodies Lamare, kiba ba la pass bad pyndep iakane ka training ba 3 bnai bad iaroh iaka Greta Solution Training academy lyngba ka jingiarap jong ki ia ka Job placement. Shuh shuh ki la ai mynsiem ia ki wei pat ki  khun samla kiba dang don hapoh ka training ba kin trei shitom bad minot khnang ba kin ioh ban kheit ia  u soh jong ka jingjop.

Ha kane ka sngi la sam iaki Certificate bad Start-up Tools ne ki tiar ban sdang trei sha baroh ki 48 ngut kiba lah dep iaka training. Ki tiar (Start-up Tools) ba lah sam ki long kum ki kharai sdieh Chow, ki Tawa, ki Gas Cylinder, ki Gas stove, ki Jing pynjar um (Strainer), ki pliang, ki proh bad kiwei kiwei.