District-Level Inter School Athletic Meet ka East Khasi Hills haka 6-8 tarik Jymmang

Syllad | The Rising MeghalayaApril 19, 2025

Ka Ophis u District Sports Officer (DSO) East Khasi Hills ha ryngkat ka jingiatreilang bad ka EKHD Athletics Association kan pynlong iaka “East Khasi Hills District-Level Inter-School Athletic Meet 2025” ka ban long naduh ka 6 haduh ka 8 tarik u Jymmang 2025 ha Madan jong ka SAI, NEHU Campus, Shillong.

Ha kane ka lympung ialehkai sports yn sakhi ia ki jait jingialehkai bapher bapher na ka bynta ki khynnah shynrang bad kynthei kiba hapoh ka rta 14, 16 bad 18 snem rta, bad la khmih lynti ia ka jingwan iashim bynta shitrhem jong kiba bun tylli ki skul.

Na ka bynta ki kyrdan Under 14 ka jingiashim bynta ha ka Kid’s Javelin Throw hapdeng ka dei kaba kongsan ia baroh, katba na ka bynta ki Under 16 bad Under 18 la shah ban iashim bynta haduh artylli ki jaid jingialehkai shimet bad kawei ka relay, ha kaba la khang ruh ia ki katto katne ki jingialehkai ba la pyniasoh lang.

Kawei pa kawei ka skul ba iashim bynta ka lah ban phah ia ka kynhun kaba haduh 75 ngut ki dkhot, kata kynthup ia ki nongialehkai bad ki nongpyniaid. Ia kane ka lympung ialehkai yn pynlong katkum ki kyndon ba la buh da ka Athletics Federation of India (AFI), bad ka jingpynrung kyrteng ne registration lyngba ka official AFI portal https://ors.indianathletics.in ka dei kaba hap ban leh na ka bynta baroh ki nongialehkai kiba angnud ban ioh rung sha ka State Level Competition.

Ka tarik ba khatduh ban phah ia ki aplikeshon kan long ha ka 17 tarik Iaiong 2025. Ka jiigjurip iaka rta ka dei kaba kongsan, kata ha ka 22 tarik Iaiong ha ka por 10 baje mynstep ha ka ophis jong u DSO ha JN Stadium, Shillong.

Ki nongiashim bynta ki dei ban pynshisha da ki kot ki sla original, kata kum ka birth certificate lane ki certificate ba la ai da ka Board bad ka Aadhaar Card na ka bynta ban pynshisha ia ka rta.

Ia ka kynhun lahduh yn jied da kaba pynshong nongrim na ka jingioh khur bun ia ki Takma Ksiar bad lada iakhaid yn khein na ki Takma Rupa bad Takma Rnong. Nalor kata ia ka khusnam nongialehkai ba tbit tam ne Best Athlete yn pynshong nongrim katkum miej khein point jong ka  Athletics Federation of India, kynthup ia ki jingialehkai ba la pyniasoh lang ha ka kyrdan jong ki khynnah kiba hapoh ka Under 14.

Baroh ki skul ki dei ban phah artylli ki lama jong ki skul (kawei ha ka por ba leh ia ka screening, kawei na ka bynta ka march in ne ka jingpynithuh iaki nongialehkai ha ka sngi kaba nyngkong).

Na ka bynta kino kino ki jingpynshai, ki skul ki lah ban phone sha u Bah K Marbaniang, PTI, ha u nombor +918575262689 ha ki kynta longtrei.