Donkam ban khmih bad sumar bniah ban heh san ki khun ki kti ong ka ADC East Jaintia Hills haka jingai jinghikai ha Latyrke

Syllad | The Rising MeghalayaNovember 25, 2023

Ka Meghalaya Early Childhood Development (MECD) and Rescue Mission ha ryngkat ka jingiatreilang bad ka  Block Development Officer, Saipung C&RD Block haka sngi Thohdieng ka la pynlong ia ka ‘Block Level Sensitization on Early Childhood Development (ECD) Mission and Rescue Mission’ ha ka prokram ba la pynlong ha Latyrke Camp Office, Saipung C&RD Block ha kaba la wan iashim bynta lang da ka Additional Deputy Commissioner, East Jaintia Hills District, ka Kong  JU Kharpuri,  Block Development Officer, Saipung C&RD Block, Dr. R Pyrtuh, District Medical &Health Officer, EJH, Dr. D Shylla nalor kiwei pat ki heh sorkar, ki nongialam shnong bad ki nongshong shnong.

Haba kren ha ka prokram ka Additional Deputy Commisioner East Jaintia Hills Kong JU Kharpuri ka la ban jur halor ka jingdonkam ban khmih bad sumar bniah na ka bynta ka jingheh jingsan jong ki khun ki kti naduh ba ki dang khunlung tad haduh ba kin da kynjoh sha ka 8 snem rta. Ka la ban jur ruh halor ka jingdonkam ban pynlut ia por bad ban btin ia la ki khun ha ka lynti kaba dei katba ki nang heh nangsan.

Lyngba kane ka jingialang ka kyrmen skhem ruh ba ki nongiashim bynta kin rah ia ka khubor halor ka jingdonkam ban shimkhia na ka bynta sumar sukher ia la ki jong ki khun rit, kata la kalong ha ka liang ka bam ka dih bad kiwei pat ki bynta ha la ki jong ki iing ki sem bad hapoh ki shnong ki thaw.

Ha kane ka prokram ka la don ruh ka jingiashim bynta da ki heh sorkar kiba mihkhmat na ki tnat bapher bapher jong ka East Jaintia Hills, kaba kynthup na ka Tnat ka koit ka khiah, Social Welfare bad ka Tnat pule puthi nalor ki nongmihkhmat na ka Meghalaya State Rural Livelihood Society (MSRLS) bad ki heh sorkar na ka Meghalaya Early Childhood Development Mission (MECDM). 

Ha kane ka prokram, ki nongai jingkren kiba la mihkhamt na ki tnat sorkar bapher bapher ki la kren halor ki mat bapher bapher kiba iadei ha ka liang ka pule puthi, POSHAN Abhiyan, Integrated Child Development Scheme (ICDS) bad kiwei kiwei.