Donkam ban leh burom ia ka 30 tarik Nohprah ban tip shaphang u Kiang Nangbah: Santa Mary

Syllad | The Rising MeghalayaDecember 30, 2023

“Ka long kaba donkam ban leh burom ia ka 30 tarik u Nohprah man la ka snem ha kylleng ki jaka khnang ban tip shaphang u khlawait ka jaidbynriew u Woh Kiang Nangbah,” ong ka MLA ka Sutnga Saipung, ka Kong Santa Mary Shylla haba kren kum ka Kongsan ha ka jingrakhe ia ka lyngkhuh sngi iap ba 161 snem jong une u riewshlur ba la khot pynlong da ka Kiang Nangbah Iasiat Khnam Memorial Society (KNIKMS) haka sngi Saitjain ha madan Kmai Blai, Syntu Ksiar, Jowai.

Ka Kongsan ka la ai khublei ruh ia ka Seng kaba la lah ban pynlong ia kaba kum kane ka prokram rakhe kynmaw burom man la ka snem khnang ban kynmaw bad ban tip  shaphang u Woh Kiang Nangbah.

Ha kane ka sngi la ioh ruh ka jingkren na u Bah A. Lakiang u Joint Secy Governor Secretariat, Raj Bhawan Shillong kum u Symbud Kongsan ula la pynpaw shaphang ki kam ba radbah jong une u Kiang Nangbah bad ki shipai jong u lyngba ki rukom ialeh thma khlaw ne (Guirella Warfare) ban pynjem khnap pyrshah ia ki shipai phareng.

Nalor kata u la ong ruh ba ka Sorkar India ruh ka la tip shaphang u Kiang Nangbah u nongialam shipai uba kat ha ka kyrdan General ba mynta ban lamkhmat ia ki shipai jong u bad ruh halor ki kyntien khatduh jong u ba ka ri kan sa ioh ia ka jinglaitluid hapoh ka shispah snem.

Shwa ban sdang ka jingialang la pynlong ka jingleit buh syntiew ha u dur mot jong u Woh Kiang Nangbah bad da ka jingpynher ia ka lama jong ka Seng da ka Kongsan.           

Ha kane ka prokram la ioh ruh ka jingkren na u Ma C. Najiar President ka Seiñ, ka Nguh Blei na u Dauruhiwaot Lamare, ka jingkren na u Riquoma Rq Laloo,  E.C Member bad ka la don ruh ka jingsam ia ki khusnam sha ki nongjop ha ki jingiakop bapher bapher ba la pynlong da ka Seng naduh ki sngi ba la dep.

La pynphuh pynphieng shuh shuh ia kane ka sngi da ki sur jingrwai na ka Morealda Paswet,  ka shad Pliang  da ka Arts & Culture KNIKMS, ka jingialehkai drama shaphang u Woh Kiang Nangbah bad u Kiri Dolloi na ka LSC Production, Shangpung, bad hadien la ioh ia ki kyntien khublei  na u R. Syngkon u General Secretary ka KNIKMS.