Donkam ban niewkor ïaka jingpynneh pynsah ia ka mariang

Syllad | The Rising MeghalayaMay 29, 2019

Ka jingrakhe ia ka sngi pynneh pynsah mariang kaba la sdang naduh ka 5 tarik u Jylliew 1974 da ka United Nations Environment Programme (UNEP) haduh kine ki sngi ka long ka mat kaba donkam ban sngewthuh  ban pynsaphriang ia ka khubor sha baroh ki nongshong shnong ia ki jingma kiba mih na ka jingpynjot pathar ia ki dieng ki siej ne ki khlaw ki btap kiba pynlong ia ka lyer jaboh ban kharoi , kumjuh ia ka jingkhuid jingsuba ka um dih.  La  seng ia ka  UNEP kaba dei kawei na ki tnat ka United Nations Organization ha ka 5tarik u Jylliew 1972 ha ka Stockholm Conference on Human Environment da ka thong ban wanrah ia ka jingpynsngewthuh sha baroh ki kyndong kynshrot ki Ri ka pyrthei ban pynneh pynsah ia ka mariang bad tehlakam ia ki jingshahktah  ki jingthaw ba don jingim bad  ka jinglong jingman ka suinbneng namar ka jingpynjot pathar ia ka mei mariang.

Man la u snem ha ka 5tarik u Jylliew kylleng sawdong ka pyrthei da ki million, billion bad ki trillion tylli ki tynrai dieng bapher bapher la ju thung da ka jingshim bynta da  ki bor sorkar jong ki Ri , ki sengtreimon sngewbha,  ki khynnah skul, ka imlang sahlang bad kiwei kiwei  da ka thong ban wanrah ia ka jingjyrngam ha ki lum ki wah. Ka sorkar jylla Meghalaya jong ngi mynta u snem 2019 ka la buh thong ban thung kumba shi million tylli ki tynrai dieng katkum ka jingpynpaw u Myntri Rangbah ka jylla. Ka dei ka kamram jong ngi iwei pa iwei na ki nongshong shnong ban shimkhia bad pyntikna ba ki symbai ne tynrai dieng ba ngi thung  ha ka sngi rakhe  pynneh pynsah mariang ne ha kiwei ki sngi ki dei ban im , heh bad san  ba ka jingthmu kan long kaba jop bad seisoh.

Ka jingthung ia ki tynrai dieng ba kin heh kin san ka long shisha kaba kongsan khnang ba kin lah ban tan sha ki, ia shibun ka lyer jaboh kaba don ha ka haw haw kaba mih na ki tdem jong ki karkhana, ki kali, ki iing ki sem ,ka jingpluh ki khlaw ki btap bad kiwei kiwei ki bynta kiba pynlong ia ka jingkiew jong ka jingshit bad jingkylla ka suinbneng kiba ktah ia ka jingheh jingsan ki jingthung jingtep, ki mrad ,kumjuh ia ka koit ka khiah u khun bynriew ,ka jingtyrkhong, ka jingum ki lum thah, ka jingkiew  ka um ha ki duriaw, ka jingshlei um bad kiwei kiwei ki jingshah ktah. Kum shibynta ban pynpaw bad kyntu ia ki nongsynshar jong ngi ha kylleng sawdong ka pyrthei da kaba sdang na la ka jong ka Ri  ka samla kynthei na Ri Sweden ka Greta Thunberg  ha u snem ba lah dep ha ka rta ba dang 15snem ka la sdang ia ka “Fridays for Future” movement  da kaba wer ia ki khynnah skul, kolej bad baroh kiba don jingkitkhlieh ia ka lawei bashngain ban lait na ki jingma ia ka jingpynjot ia ka mariang ban mih shakhmat ban leh eiei ha shuwa ba ka por kan dier. Ha ka nongbah Shillong jong ngi kum ka jingkyrshan ia katei ka phang ha ka 24 tarik u Jymmang mynta u snem, ki samla pule ki lah iaid paidbah na Don Bosco Square sha State Central Library ha ryngkat ka jingaiti ia ki jingai jingmut sha ka sorkar jylla ban shim ki lad ki lynti halor ki jingshah ktah namar ka jingpynjot pathar ia ka mei mariang.

Ka la dei ka por ba ngin sngewthuh bad don ka jingmlien ba ngin thung bujli bun tylli ki symbai ne tynrai dieng lada ngi pom ia uwei u dieng ne jingmlien ban thung dieng katba lah ei  khnang ba kan nym don jingktah ia ka mariang namar ba ngi hap ban pom ia ki dieng ha ki jingdonkam kiba pher bapher jong ngi man la ka sngi. U khun bynriew um dei ban shu shim kabu tang ia ka myntoi shimet ha ka khaii pateng hynrei u dei ruh ban pyrkhat ia ka pateng ba mynta bad ki ban sa wan khnang ba kin lait na ki jingshitom kiba bun jait, ba kin biang ka bam ka dih, ban lait na shibun ki jingshah ktah.

Ka bor sorkar marwei, ki sengtreimon sngewbha, ki nongialam shnong ne hima, ki riew shimet kiba long trai ia ki jaka khlaw  kin nym lah satia ban pynurlong ia ka jingjop ha katei ka bynta tang ma ki. Ka donkam ka jingkitkhlieh bad  jingiashim bynta kaba ryntih jong ngi iwei pa iwei ban kiar na ka jingpynjot pathar ia ki dieng ki siej da kaba sumar ia ki, kumba ki longshwa manshuwa ki jong ngi ki lah iohi lypa ia ka jingdonkam ki khlaw ki btap da kaba pynneh pynsah ia ki lyngba ki law kyntang, law khang bad ki khlaw ba la buh da ki tnat sorkar bapher bapher ha kine ki sngi. Ngi donkam ban sngewthuh ba ki jingtreikam ki jong ngi kiba man la ka sngi ki ktah ia ka mariang haba pynjaboh ia ka, kumta ngi donkam ban long kiba phikir khnang ba ngin lah ban jop bad weng ia kita ki jingeh baroh .

Kyrmen ba ka jingrakhe ia ka sngi pynneh pynsah mariang mynta u snem ha ka 5 tarik u Jylliew halor ka mat pdeng “Beat Air Pollution ” ba kumno ngin ioh ia ka lyer kaba khuid ba ngin ring mynsiem kan long shisha kaba khia thew bad don jingmut ka ban rung ha ka pyrkhat pyrdain ki jong ngi baroh na bynta ka jingmyntoi jong ngi hi ha ki sngi bad por ban wan ym ba ngin shu rakhe pyndep rukom da kaba klet noh ia baroh kito ki tynrai dieng ba ngi thung hynrei ban da sumar sukher ia ki bad kumjuh ruh ban iada ia ki khlaw ki btap kiba lah don lypa da kaba kiar ban pynjot pathar ne thang dusmon ia ki.

Ki bor sorkar ki dei ban shimkhia ban pynshitom da kaba pynhap katkum ki kyndon pynjot mariang ia kito kiba pynkhein ia ki aiñ ïada mariang kum ka Indian Forest Act, 1927, Environment Protection Act, 1986, Wildlife (Protection) Act, 1972, The Water (Prevention and control of pollution) Act, 1974, The Air (Prevention and control of pollution) Act, 1981 , The Factories (Pollution and Pesticides) Act, 1948 bad kiwei kiwei ki kyndon.