Donkam ban tehlakam ia u drok lyngba ki jaka rung sha ka Jylla: Paul Lyngdoh
U Myntri ka Tnat Social Welfare u Bah Paul Lyngdoh u la ong ba donkam tehlakam ia ka jingioh rung jong u drok bad kiwei pat ki jait jingdih pynbuaid sha kane ka Jylla da kaba pynkhlain ia ka jingpahara ha ki jaka rung.
Haba kren sha ki lad pathai khubor ha ka 14 tarik Jymmang, u Bah Paul u la ong, “Naduh ba ka sorkar ka la pynbna ia ka thma pyrshah drok, na ka liang ka Tnat pulit ka la trei borbah ban tehlakam ia ki kam khaii drok ha ka Jylla ha kaba ki la don ruh ki jingshah kem bad shah pynngat hapoh ki kyndon PITNDPS Act, 1988, ha kaba ki pulit kila dep ruh ban phah ia ka thup kyrteng jong ki nongkhaii droks bala kem sha ka Advisory Board, ka ban sa shong shen hadien ba kut ka jingtreikam ka Model Code of Conduct (MCC), ba kan shim rai halor ki jingpynsaja katkum katei ka Act.
![](https://www.syllad.com/wp-content/uploads/2024/09/JIT-Vacancy-823x1024.avif)
Nalor kata u la ong ruh ba u la dep ban iakren bad u Symbud Myntri Rangbah ka Jylla uba khmih ia ka Tnat kam pohiing (Police) ba ngi donkam ban pynkhlain ia ka jingtreikam jong ka Tnat pulit ha ki jaka rung ne entry point. U la ong ruh ba haduh 70% na ki jingdih pynbuaid kiba la ioh rung sha Meghalaya ki la wan lyngba napoh East Jaintia Hills, bad kumta donkam ban pynkhlain shuh shuh ia ka jingtreikam jong ki bor pulit ka district.
“Hynrei kane baroh kan sa urlong hadien ka jingpyndep ia ka jingthung kam pulit ia palat 3000 ngut bad 500 ngut ki volunteer ka tnat Home Guard.Dei tad hadien ba kine ki la wan urlong ngin sa lah ban tehlakam ia ka jingwan rung jong u drok sha ka Jylla,” bynrap u Myntri.
U Myntri u la pynpaw ruh halor ka jingdonkam ia ka jingiatreilang hapoh ka imlang ka sahlang, bad kyrpad ruh ia ki nongialam shnong ba kin shim ia la ki jong ki bynta ha kaban buh ia ki deaddiction bad rehabilitation centre hapoh ki shnong ki thaw.
Nalor kata u Bah Paul u pyntip ba ka Tnat kala tyrwa ruh ban thung ia u Mission Director ba thymmai na ka bynta ka DREAM Project namar ba u Director ba mynta um don por satia namar kiba bun ki jingkitkhlieh ba u kit hapoh ka Tnat kam Pohiing
Leave a Reply