Donkam ïaka bor ban kyntait lane pynbeit ïaki Ain ka sorkar kmie hashwa ba kin treikam: HYC

Ngi iohi ha kine ki sngi bad ki snem kiba la iaid, ki la don bun ki aiñ kiba ktah bha ia ka hok kyrpang ka Bri u Hynniewtrep khamtam eh na ki Ain ba ka sorkar India ka shna. Ki bun ki Ain ka sorkar India  ki bym iahap bad ka jinglong kyrpang ka jaidbynriew Hynniewtrep jong ngi khamtam eh ha ka rukom bat kyndew, ka Kam ki marpoh khyndew, ka Kam khlaw, ki Kam halor ka Riti dustur bad kiwei.

Kum ka Jylla ngi don tang 3 ngut ki MP ha Parliament (2 Lok Sabha bad 1 Rajya Sabha). Lada ngi, mon ne ngim mon ruh ka Parliament ka lah ban shna kano kano ka Ain wat la ka ktah katno katno ia ngi kum jaidbynriew. Kumta ngi don kam ia ka bor ba ka jylla ka lah ban kyntait ne ban pynlait ialade (reject & exempt) bad ban pynbeit (modified & alter) ia kino kino ki Ain ka sorkar kmie ha shwa ba kin treikam ha ka Jylla.

Kum kane ka bor jong ka jylla haduh mynta ka don ha ka paragraph 20 (b) jong ka Sixth Schedule kaba treikam ha Assam bad mynshwa ka  UKJHADC lem bad ka GHADC ha shwa ban ioh ia ka jylla ruh ki don kum kane ka bor, hynrei mynta  naduh ba la pynkylla ia ka Sixth schedule ha u snem 1971 ia kane ka bor la shimnoh da ka sorkar kmie lyngba u president ha ka paragraph 20(A)(b). Kiwei ki jylla kum ka Nagaland bad Mizoram ruh ki don ia ki bor ba ia syriem ha ki article 371(A) bad 371 (G) Tangba ka dei tang halor ki Riti , ka khyndew bad ka niam ym ha kiwei pat ki bynta .

Ka sorkar Meghalaya ha ka por ba khang ka NGT ia ka jingtih dewiong ka la pyndon kam ia ka paragraph 12 (A)(b) bad mynshwa ruh ka la pyndonkam teng ban dawa pyllait ia ka Forrest conservation act 1980. Tangba baroh ar sien ki sepei namar u President lane ka Sorkar Kmie kam sngap ia ki jingkyrpad ka jylla bad kumta ki Ain kum ka MMDR Act, ka Mine Acts , ka Forest Conservation Act, ka NGT Act, ka National Reservation Policy, ka Citizenship Act, ka Atomic Energy Act, Land Acquisition Act, Indian Registration Act  bad kiwei ki notification bapher ki treikam ha ka Jylla jong ngi wat la kim ia dei dur bad ka jinglong kyrpang jong ngi .

Ha ka por ba Ka sorkar NDA ka thmu ban wanrah ia ka Citizenship Amendment Bill ngi sngewthuh ba kan ktah ia ngi. Ngi don tang khyndiat ki MP ha Parliament na ka jylla bad ngi hap ap ia kiwei de ki MP na kiwei ki jylla ban iarap lem ia ngi. Ngi tieng bad ngi syier kum ka jylla namar ngi tip shai ba ngim lah ban iada ia lade lada ki MP na ki jylla heh paid ki thom la ka thom ia ngi. Mynta lada ka sorkar kmie ka pynduh noh ia ki Ain kum ka Meghalaya Land Transfer Act, Meghalaya Job Reservation Policy , ka Sixth Schedule, Trading by Non Tribal Act bad kiwei ruh ki lah wat lada ngi pyrshah .

Na ka liang ka seng ngi la thoh bad dawa ia kane na ka sorkar u Dr. Mukul Sangma mynshwa bad kumjuh ruh na ka sorkar u Conrad K Sangma Myntri Rangbah ka Jylla bad ngin dang iai buddien ia kane. Nalor kata, khang ba ngi kum ka jaidbynriew Hynniewtrep ngin nym shah thombor bad ngin nym shah pyntroin ha ki Ain ki bym iahap bad ngi, ka por ka la dei ba ngin ia tylli lang kawei ban dawa noh ba ka sorkar India kan ai ia ka bor ha ka Jylla ba ngi lah ban kyntait be ban pynlait ia lade lane ban pynbeit ha shwa ba ki Ain ka Sorkar Kmie kin treikam ha ka Jylla bad ngi lah ban leh ia kane da kaba dawa ba ha ka jaka ka kyntien “President” ka paragraph 20 (A) (b) ka Sixth Schedule dei ban buh biang ia ka kyntien “Governor” lane ngi lah ban dawa ia ka Article 371 ba kyrpang na bynta ka jylla Meghalaya.

Da U Robertjune Kharjahrin | President HYC | Roykupar Synrem | General Secretary HYC