Donkam ka jingithuh para kur ong u ma Sniawbhalang haka Dorbar Kur Dhar

Syllad | The Rising MeghalayaSeptember 14, 2019

JOWAI: U Myntri ka tnad Transport bad kiwei u Ma Sniawbhalang Dhar ula ong ba ka jingithuh para kur para jait kadei kaba donkam bha ha kano kano ka kur ban ithuh ithaw bad ban lah ban pynbha ïaka imlang ka sahlang naduh ka shongkha shongman haduh ka kam iap kam im jong ka kur.

“Ka kur ka jait ka kynja kadei kaba kyntang ha ngi ki briew, hynrei namar ka jingïabeh ïaka kam shimet bunsien ngi klet ïaki kam ka kur bad ngim ithuh ithaw para kur,” la ong u ma Sniawbhalang Dhar haba kren kum u kongsan haka jingïalang ka Dorbar jong ka Kur Dhar kaba long ha Jalapang, Wahiajer haka sngi Saitjaiñ.

Ula kyntu ia baroh ki para kur Dhar ba haba leit ba wan ha kino kino ki shnong ki thaw ne ha kino kino ki kam pynithuh ïalade iaka kur ka jait khnang ban ithuh I thaw kum ka kur Dhar kaba heh ka kur bad ula pynpaw ka jinglong kloi ban ïarap ïa kino kino ki jingeh jong ka kur katba lah ka bor.

Ïa kane ka jingialang ka Dorbar Kur Dhar la pyniaid da u President R Dhar, la ioh ia ka jingduwai na u ma Wansalan E. Dhar. Ïaki kyntien pdiang na u S. Dhar, Chairman Kur Dhar Wahiajer. Kiwei kiwei kiba ai jingkren ki kynthup ïa ka samla Fabiola Rupa Dhar kabei ka Muktiar, Kong Leslymon Dhar na ki longkmie, Adviser LLKD Jaiñtia ma DB Dhar, ma H Dhar Doloi Elaka Nartiang.

La  pynsngew ruh ia ka Report kyllum na u General Secretary ma DS Dhar, kong Nila Dhar Treasurer, President Kur Dhar Shillong bah Stevenson Nongdhar bad kiwei.

Kumba juh leh manla u snem ka kur Dhar ban pynshlur bad ban ai mynsiem ia ki samla pule ka kur ka la ai sngewbha da ki khusnam ba kyrpang ryngkat ki syrnod sha baroh ki samla pule jong ka kur kiba pass bha ne kiba poi shakhmat ha ki kyrdan bapher bapher ha ki eksam ba dang shu dep.

Ban pynbha shuh shuh ia ki rukom treikam jong ka kur Dhar la iashim bynta lang ha ka ban iaphylliew jingmut na ka bynta ka bha ka miat jong ka kur hi baroh kawei jylla. Mynta ka sngi khnang ban pynkhlain shuh shuh ia ka rukom treikam jong ka kur, la ioh ban pynskhem ia ki lai tylli ki Zone treikam jong ka Kur Dhar ha Rilum Jaiñtia kiba don haki Elaka bapher bapher.

La pynphuh pynphieng ia kane ka jingiakynduh lang ka Dorbar Kur Dhar da ki jingshad bad rwai tynrai bala shimbynta shitrhem da ka samla jong ka kur na ki shnong bapher bapher.