Donkam ka sorkar jylla 21600 ki CRPF ban khynra kam shalan dewiong beain, ong ka Meghalaya High Court kham shongnia da ki CISF

Syllad | The Rising MeghalayaMarch 14, 2023

Ka sorkar Jylla kala pynkhreh ban buh haduh 160 company ki shipai CRPF ban tem iaka jingshalan dewiong beaiñ ha Jylla Meghalaya

Ka Sorkar Jylla haba tyrwa ban buh da ki CRPF, kata 100 company ha rilum Khasi Jaintia ne Eastern Range bad 60 company ha rilum Garo ne Western Range. Kine ki shipai ki don haduh 135 ngut shi company baroh kila kot haduh 21600 ngut ki shipai.

Ia kane ka sorkar kala tyrwa haka mukotduma PIL kaba shim case hi da ka iingbishar Meghalaya High Court ha kaba iadei bad ka jingtih dewiong bad shalan beain ha Jylla.

Wat la ka sorkar Jylla kala tyrwa bin bin iaka jingdonkam iaki shipai bad ki pyrton shipai ha baroh 12 district ban khynra iaka kam khaii dewiong beaiñ, hynrei ban pyntreikam lada dei tang kaba shipor ruh kam dei ka suk ban pyntreikam namar kan ktah iaka por, ka pisa bad ka bor. Bad tang ban shna iaki jaka sah ki shipai kala kot 316 klur tyngka bad ka jingshim wai iaki kali kan kynjoh 58 klur.

Hynrei ka ïingbishar haba bishar kala ong ba ka kham shongnia ban buh da ki Central Industrial Security Force (CISF) kiba long laitluid haka jingtreikam ban iaki CRPF kiba hap hapoh ka jingpyniaid Pulit ka Jylla.

Ka iing bishar kala ong ba haba peit iaka jaka baroh ha Jylla ki don ki bynta ba long kyndong kiba ym don wat ka surok bad kam don ruh kata ka jingma naka khaii dewiong beain bad 10 company ki shipai CISF kala biang ban khynra iaki kali bad ban kem ia kiba shalan dewiong beain.

Kane ka kam kan nym neh bun snem namar ba ka sorkar jylla kan sdang iaka scientific mining bad ki licenses ruh yn ai katkum ki kyndon jong ka aiñ ka ban pynlong iaki nongkhaii ba kim leh beain shuh hadien habud.

Ha kaba iadei bad kane ka buh iaki shipai CISF, yn jied bad pynbeit ryntih iaki jaka ban pahara da ka jingiasyllok bad u Justice Katakey kumjuh ruh iaka jingsiew jingtda da ka jingiapynbeit hapdeng ka sorkar kmie bad ka sorkar jylla.

Ia kane ka mukotduma ka iingbishar kan shongbishar biang haka 20 tarik Lber 2023.