Duh ei u rangbah iaka jingim ba samthiah haba niah kali

Syllad | The Rising MeghalayaMarch 9, 2024

Ha kawei ka jingjia ka bym shym poi pyrkhat kaba la jia ha ka 7 tarik mynta u bnai uwei u briew u la duh ei la ka jingim hadien ba ka kali kaba u niah hapdeng ka jingshoh samthiah kala kem ding kynsan ha ka lynti surok Wahiajer- Nartiang.

Na ka liang ki bor pulit ki la ong ba ha katei ka sngi ha ka por kumba 6:30 jan miet ki la ioh jingtip ba ka don kawei ka kali kaba la kem ding ha kaba uwei u briew u la sahkut hapoh jong ka kali ha ka lynti surok Wahiajer – Nartiang ha kaba ki la her mar mar sha katei ka jaka bad lap ia kawei ka Maruti Zen kaba la ingkhong ha kaba ia u nongniah uba la mynsaw jur la pynkit noh shapoh Woodland WK Hospital, Sabahmuswang.

Ha ka jingtohkit, ki pulit ki la ong ba une u briew u dei uba la tip kyrteng kum u Abipaia Bareh uba dei na ka shnong Nartiang. Ki la ong ruh ba une u briew u la don hapdeng ka jingmynsaw kaba jur ha kaba la pynkynriah noh sha ka Nongbah Shillong na ka bynta ban ioh ia ka jingsumar kaba kham biang.

Ki pulit ki la ong ruh ba une u lanot u dang lah ban iathuh hakhmat ki doktor ba katba u dang niah ia ka kali kynsan kynsan um shym la lah shuh ban tehlakam namar ka jingshoh samthiah palat bad kane ka kali ka la leit shabar surok bad kem ding.

U Bah Bareh u la khlad noh namar ka jingjur jong ka jingmynsaw ha katei hi ka janmiet, ong shuh shuh ka khubor pulit.