Duh klas da ki hajar ngut ki khynnah ba pass SSLC bad HSSLC ha West Jaintia Hills shimkhia ka KSU, JSU bad AJMRW&LU ban iakren

Syllad | The Rising MeghalayaSeptember 15, 2021

Da ki spah ngut ki samla pule ka rilum Jaiñtia kiba la pyndep ïaka SSLC ne matrik kumjuh ruh ïaka HSSLC kiba angnud ban bteng ïaka jingpule jong ki, kila shah kyntait ban ïoh rung klass ha Kiang Nangbah Government College bad kiwei kiwei ki skul sorkar hadien ba la pynmih ïaka thup kyrteng kaba khatduh (3rd list) ha kine ki sngi ba lah dep.

Kumta haba ïadei bad kane ka jingduh klas ki khynnah, ka All Jaiñtia Muster Roll Workers & Labour Union (AJMRW&LU) hapoh ka jingïalam u President u Khroo L Pariat haka 15 tarik une u bnai ka la ïakynduh ïaka Principal bad Vice Principal jong ka Kiang Nangbah Government College.

Haka jingïakynduh ka Vice Principal ka Kong N. Bthuh ka la ïathuh ba haduh 400 ngut ki khynnah la pynrung haka Class- 11 (Arts) na ki 1800 ngut kiba la buh application.

Ka seng ki nongbylla ka pynpaw ka jingsngewdiaw namar ba bun bha ki samla ki bym ïoh shuh ban rung klass khamtam ha ki skul bad kolej ba pynïaid da ka sorkar ha West Jaintia Hills District.

U President u Bah Pariat ula kynnoh ba ki skul sorkar ki buh da ka percentage ban pdiang ïaki khynnah haka klass 11 bad kane ka jingpynïaid jong ki Principal ka long pyrshah ïaka aiñ pule puthi.

Ha kawei pat ka khubor ki dkhot ka Khasi Student Union (KSU) Jaintia Hills District Education Cell haka jingïalam u Justice Paul Lyngdoh Education Secretary ki ïakynduh ia ka Principal jong ka Kiang nangbah Government College, Jowai haba ïadei bad ka jingpynrung klas ïaki samla pule kiba la duh ban rung ha katei ka kolej.

Haka jingïakynduh ka Khasi Students’ Union (KSU) Jaintia Hills District Unit ruh kala leit ban iakynduh iaka bor pyniaid jng ka kolej Kiang Nangbah Government College.

Ka KSU kala dawa na ki bor pynïaid kolej ba ymdei ban don iwei ruh i samla pule kiba la thep kyrteng ban duh ban pule ha katei ka kolej namar ba kim don lad shuh shawei nalorkata kiba bun hi kiba thep kyrteng ha katei ka kolej dei kiba wan na ka longïing baduk.

Ka JSU ruh kala ïakynduh ka Joint Director bad District School Education Officer bad kala pynpaw ba ka jingbym ioh klas ki khynnah bad samla ban bteng iaka jingpule ha Kiang Nangbah Government College, Government Boys Higher Secondary School bad Government Girls Higher Secondary School.

Ka JSU kala ong ba haduh 1700 ngut tam ki khynnah pule ki bym pat ioh ban rung klas XI ha ki stream bapher bapher bad ka JSU ka dawa mardor naka sorkar ba ka dei ban pynrung klas ia baroh ki khynnah bad samla ba kin ioh ka lad ban bteng iaka jingpule ha kine ki sklu sorkar.

Ka seng JSU ka ai jingmut sha ka sorkar ba ka dei ban pynlong noh daka skul step bad skul miet iaki ki klas XI bad klas XII khamtam iaka Arts Stream namar kham bun ki khynnah kiba duh klass kidei na ka Arts stream

Ka JSU ka phah iaka kyrwoh sha ki khynnah pule ba kim dei ban duh jingkyrmen ha kum kane ka por bad ka seng kan ym shong thait bad ka seng kan iakren biang bad ka bor sorkar ban wad ki lad ki lynti ban pynrung klas ia baroh ki khynnah bad samla hapoh district.