Duh rung Bangladesh da ki spah tylli ki trok kit dewiong ba pyndonkam Challan thok

Syllad | The Rising MeghalayaOctober 20, 2019

JOWAI: Da ki spah tylli ki trok kit dewiong kila duh ban rung sha Bangladesh hadien ba ka DMR kala lap ba ki pyndonkam da ki Challan thok.

Ha ka sngi Saitjaiñ haduh 133 tylli ki trok dewiong kila ïoh rung sha Bangladesh lyngba ka kad khaii na Tamabil. Na kine ki 133 tylli ki trok dewiong ka khyrdop jong ka DMR kaba don ha Tamabil, Dawki kala lap 61 tylli ki trok kiba suba jur ba ki pyndonkam da ki Challan thok bad ym shym la ai jingbit ïa kine ki trok ban rung sha Bangladesh.

La ïathuh ruh ba ha kane ka taiew kumba 127 tylli ki trok kit dewiong kim shym la ïoh rung sha Bangladesh hadien ba suba jur ba ki pyndonkam da ki Challan thok.

Kane ka khyrdop jong ka DMR hadien ba kala lap ïa kine ki Challan thok kala pyntip sha ki bor ba halor bad la bthah ïa ki ban ki jurip thik pa thik ïaki Challan ban khanglad ïa kane ka kam khliehshrieh jong ki nongkhaii dewiong.

Lada shim jingkhein malu mala na kine ki 127 tylli ki trok lada kin kit mar 9 ton, u dewiong uba la duh rung sha Bangladesh ula kot haduh 1143 metric ton. Ka dor iew u dewiong ba bha ula kot T.7500-T.8000 tyngka shi ton bad uba duna eh ka dor u dewiong kalong T .4500 shiton. Lada khein haka dor T.4500 shiton baroh ka pisa kala kot T.5143500.

Ha kane ka jingkhein lada ka sorkar kam shimkhia ban teh lakam ban khanglad ïaki Challan thok  kan duh nong da ki phew lak haka shitaiew.