Duh um duh network ka shnong u MLA Mowkaiaw, ujor ka KSU

Syllad | The Rising MeghalayaNovember 7, 2020

Ki shnong kiba hap haka thain Mowkaiaw, kaba mihkhmat da u ma Nujorki Sungoh kum u MLA kila shem jingeh na ka daw ka jingkyrduh um bad ka jingthud ka network mobile kaba la pynlong iaka Khasi Students’ Union (KSU) Leimow Unit ban shim iaka sienjam ban ujor sha ki bor ba dei peit haka sngi Thohdieng.

Ka KSU Leimow Unit haka jingialam u president Javelin Shadap bad u general secretary kila leit ban iakynduh ia ka EE ka PHE (RWS Division) Jowai halor ka jingkyrduh um ka shnong Mootyrchiah bad Mukhap.

Kaba lyngngoh ka shnong Mukhap kadei ka shnong u MLA Mowkaiaw, hynrei ka KSU kala kynnoh ba kane ka shnong ka dei kaba shah ktah bha na ka jingkyrduh um bam umdih ki paidbah ha baroh ka shnong.

Haka dorkhat ba la ai ka KSU sha ka engineer ka ong “Ka jingbympoi ka um ha kitei ki ar tylli ki shnong ka ktah shisha iaki paidbah khamtam bala poi ka aiom tlang.”

Ka KSU kala ong ruh ba halor kane ka jingkyrduh um kila dep ujor, hynrei naka liang ka PHE kam shym la shimkhia ban pynbiang um iaki paidbah.

Ka KSU kala kam ba nakaliang ka engineer kala ong ba kila dep mang ban shna jaka pynlang um ne top um (water tank), hynrei kaba sah kalong ba ki dang ap iaka pisa ban ioh tei iaka jaka pynlang um.

Haka juh ka por ka KSU Leimow kala iakynduh ia u Manager ka JIO Company ha Jowai ban pynbiang iaka jingshakri sha ki thain nongkyndong khamtam haka shnong Mootyrchiah, Mukhap bad Mowkaïaw kaba thud bha jingshakri kane ka company.

“Ka jingthud ka network jong ka Jio Company sha katei ka thaiñ ka ktah ym tang ïaki kam ki jam jong ki paidbah ba pyndonkam iaka phone da ka Jio, hynrei wat ïaka khynnah skul kiba hap ban shong klas Online manla ka sngi,” la ong ki nongialam ka KSU bad lada na u manager ka JIO ban pynbiang iaka network khnang ban nym thud ki kam ki jam bad ka pule puthi ki khynnah skul.