Duna 6000 ki kam ba lait ha ki tnad sorkar haka Jylla

Syllad | The Rising MeghalayaMarch 14, 2019

SHILLONG: Haduh 5894 tylli ki kam kiba lait thylli haki 48 tylli ki tnad sorkar jong ka Jylla Meghalaya.

U Myntri Rangbah ka Jylla, Conrad K Sangma ula ong haba jubab haka kynta kylli jingkylli hapoh ka ïing dorbar mang tyngka ka jylla .

Na ki 5894 ki kam ba thylli, 1894 ki kam ba lait na ki tnad sorkar la pyntip sha ki bor ba dei peit ïaka kam thung kam thung jam kum ka Meghalaya Public Service Commission (MPSC), District Selection Committees (DCS) bad katto katne sha ka  Secretariat Administration Department (SAD).

U MLA ka Umroi, Bah George B Lyngdoh ula buh jingkylli ïaka sorkar hato kan phah ban khmih bniah khang ban pyndap ïa kine ki kam ba lait thylli.

Ha kaba ïadei bad ka kam thung kam ïa ki kam ba lait ha ki tnad sorkar, u Conrad ula ong baka MPSC, DSC na ka por shaka por kala pynbna paidbah bad pynlong ïaki eksamin bapher bapher bad ka shim por namar ba ki hap ban iaid katkum ki kyndon treikam jong ka thung kam thung jam.

Ki tnad sorkar kila pyntip na ka por shaka por sha ka tnad MPSC bad kila kyntu ban leh ïaka ba donkam ban pyndap ïaki kam ba lait thylli.

Ka tnad Pulit jong ka jylla ka dei kaba don shibun eh ki kam ba lait bad kala kot haduh 1962 ki kam ba lait, ka tnad pule puthi 1370 bad ka tnad ka koit ka khiah 329 tylli ki kam ba dang sah thylli.