Duna 70 klur ka bhah pisa ka JHADC dangsah haka sorkar na u dewiong, mawshun bad khajna kali: Ma Thombor Shiwat

Syllad | The Rising MeghalayaNovember 19, 2021

U Ma Thombor Shiwat, Chief Executive Member (CEM) Jaintia Hills Autonomous District Council (JHADC) ula ong ba ka konsil ka dang dei ban ioh haduh T.63,76,86,901/- naka bhah (share) hadpeng ka sorkar bad ka konsil na ka khajna Major bad Minor Minerals bad kumjuh na ka khajna motor vehicle tax.

U CEM ula ong ia kane haka dorbar tlang ba shisngi ka konsil kaba long haka sngi Thohdieng haba iakren iaka mat iakren (motion) kaba la wanrah da u nongialam ka liang synshar u ma Awhai Andrew Shullai halor ka jingduna pisa ka konsil bad ban pyniaid shakhmat iaka kam ki jam ka konsil. U ma Thombor ula ong ba na kane ka T.63 klur, ka khajna na ka bhah dewiong (Major Mineral) kalong T.48,18,11,649/-, na ka Minor Mineral ne u mawshun kalong T.12,83,47,654/- bad na ka Motor Vehicle Tax kala kot T.2,75,27598/-.

U ma Thombor ula ong shuh shuh ba ki dang don ruh ki khajna kiba hap ban iakren pynbeit bad ka sorkar kiba sah naduh u snem 2014-15, 2015-16 bad 2016-17.

Kane ka mat iakren ba wanrah u para dkhot kadei kaba kongsan khnang ba ki para dkhot hapoh ka iing dorbar kin ioh jingtip halor kumno la pyniaid iaka konsil wat hadpeng ka khim ka khait bad ka hiran ka pla tyngka konsil, la ong u ma Thombor bad ong artad “Kane ka Executive Committe kadei kaba sniewbok tam namar hadien ka jingwan lyngshop ka khlam kala wanrah iaka jingtynjuh nalor bym ioh iaki khajna haka por kaba biang na ka sorkar.”

Ha kaba iadei bad ka jingai NOC bad ka khajna ba dei ban iohlum na ki karkhana, ki nongialam kiba hashuwa jong ngi kila bakla ban shna iaki jingiakut kaba la wanrah jingeh pat ia ngi kiba shim pateng ban ksaid ban thaw ki lad ki lynti kumno ban tem iaka jinglait rud ka khajna shabar ka pla tyngka, ong u Ma Thombor.

U Ma Thombor ula ong ba mynta kane ka Executive Committee kala trei shitom bad shna ia ki ain ki kyndon ban teh iaki karkhana khamtam ki Coke factory ne ki karkhana sain rnga dewiong haba ai NOC bad kumno ban ioh khajna nalor ka NOC naka jingpynmih ne ka nong jong ki. Shuh shuh ula ong ba kila pyrshang ban buh iaka khyrdop (Monitoring Check Gate) ha ki karkhana ban ioh shim jingkhien jingdonkam mar pohkhyndew ki karkhana, hynrei namar ka sorkar kam ailad kane ka kam kala sahteng.

“Kane ka EC kaba mynta kala pyrshang har rukom ki jingpyrshang, hynrei ba don kiwei pat ki bor, ka pyndkoh iaka jingthmu ka EC kaba ngi kum ki MDC ngi kylla long kum ki diengpynkiang lada ngi pyrshang ban trei na ka bynta ban pynbha iaka konsil,” ong u CEM.

Kawei pat ka daw kadei ka jingbun palat ki nongtrei ka konsil kaba shem jingeh bha ban pyndap iaka tulop bad kane ka EC kaba mynta kala sangeh shi syndon ban thung nongtrei ban iakhun pynduna iaka jinglut ka konsil.

Ka Sorkar kala ai ksai ban ai ka bhah ka konsil shuwa ka Christmas bad iaka bhah kiba rim ruh ka pynbeit iaka jingkhein jingdiah ka dang iaid shait shait. “Lada ngi ioh ia kane ka bhah kaba ngi dei ban ioh kan kham pynjem iaka jingeh ka konsil,” la ong u ma Thombor.

U Andrew Shullai shuwa ban weng iaka motion kaba ula wanrah haba kren ula ong “Ngi sngewthuh iaka jingeh, hynrei ka EC ka dei ban pyni da ka kam ban khot ruh iaki karkhana dewbilat ban ai jingpynshai balei kim kohnguh ban siew iaka khajna kiba ki dei ban siew.”

“Kaei kaba EC ka leh dei ban pyni da ka kam, ym ban shu shong kli kti bad ban don ka thong ban pynjem iaka jingeh halor ka jinghiran ka ioh ka kot ka konsil,” la ong u Ma Andrew.

U Andrew ha kane ka mat iakren ula dawa na EC ban pyndam ruh iaka NOC kaba la ai sha ka sorkar na ka bynta ban ker sainar shiah kaba la pyndam ha u snem 2017 bad la pynim biang na ba ka bynta ker sainar na Jaliakhola (BP- No. 1299) haduh Dawki (BP NO. 1273) kaba iasam pud ka Jylla bad ka Bangladesh. Lada iaid shakhmat kane ka jingker 6000 acre ka jaka ki paid ka thain War kin duh noh iaka jaka.

Ula ban biang ba ka konsil ka dei ban don ka thong haka rukom treikam khnang bad pynthikna ba shuwa ka Christmas ka konsil kan ioh ban siew iaka tulop kaba sah kumjuh ka advance tulop jong u bnai Nohprah ba ki nongtrei kin ioh lehkmen.

Kiwei kiwei kiba iashimbynta ha kane ka mat iakren ki dei u Deputy CEM Ma Lasky Rymbai, Winning Garland Sungoh, Phasmon Dkhar, Arbor Hima Darnei nalor u MDC ka liang pyrshah Holando Lamin.