Ba duna ka bhah thungkam ïaki Scheduled Tribe ha ka bank MRB dawa ka JSU & HANM ban tuklar ka sorkar

Syllad | The Rising MeghalayaJune 26, 2019

SHILLONG: Ka Jaintia Students’s Union (JSU), Shillong Circle bad ka Hynniewtrep Achik National Movement (HANM) hapoh ka jingialam u Treiborlang R Suchen bad u Lamphrang Kharbani ki lah leit kynduh ia u Dilip Kumar Guha, Chairman Meghalaya Rural Bank (MRB), Shillong kaba don ha Khyndailad, Shillong haka sngi Balang halor ka jingduna ka bhah ïoh kam ha katei ka bank.

Hadien ka jingbuddien jong kine ki ar seng halor ka bhah iohkam kila samla bala nang bala stad ka jylla, kine ki ar seng kila kam ba ka theh shilliang bha hapoh kane ka bank MRB bad la lap ba hapoh ka jylla na ka bynta ka kam Scale-1 Officer ka lait tang kawei na bynta ki Scheduled Tribe bad ia kaba kham bun ka leit sha ka General Category haduh 6 tylli bad 2 tylli ia ki Scheduled Caste.

Na ka liang ki ar seng ki lah pynpaw ba kim sngew iahap ia ka reservation policy jong ka sorkar pdeng namar ia ki post ophisar ki pyllait tang ka wei ka post na bynta ki Scheduled Tribe hapoh ka jylla Meghalaya bad kane ka pynduh jingkyrmen bad khanglad ia ki khun samla kiba biang ka kyrdan pule ban ioh rung kam ha kane ka Bank.

Ki ar seng ki lah dawa ia ka sorkar jylla hapoh ka jingialam u Myntri Rangbah u Conrad Sangma ba u dei ban tuklar ban dawa na ka sorkar kmie ba kan ai lad ia ki khun samla (Scheduled Tribe) ban rung kham bun sha ka kam ophisar hapoh ka Meghlaya Rural Bank.

U President jong ka JSU Treiborlang R Suchen u la kyntu ia ka sorkar jylla ba kan shim ia ka nuksa na jylla Mizoram namar ha Mizoram ka post na bynta ka Ophisar scale-1 ka kham bun ia ki ST ban ia kiwei pat ki kynhun kaba long 5 tylli ia ki ST bad tang 2 tylli ia ki General Category, hynrei hapoh jylla ka jong ngi ka long mar khongpong namar ia ka post ophisar ka lait kham bun ia ki General kadei 6 tylli bad tang kawei ka post ia ki ST.

U la ong ruh ka jing kiew jong ka jingkyrduh kam kyrduh jam, kam dei ba ym donkam hapoh ka jylla, hynrei kadei ba ngi lah shah knieh ïaka hok kum ki trai ri trai muluk. U la ong shuh shuh ba kane kam dei ban long ka issue politics ban ia kynnoh mar kylliang hapdeng u Myntri Rangbah barim bad u ba thymmai kumba long ha u snem u ba lah dep hapoh ing dorbar thawaiñ.

Na ka liang u Treiborlang u la kyntu ruh ia ka sorkar kaba mynta ba kan thaw noh da ka aiñ na bynta ki samla kum ka State Job Policy bad ka State Youth Policy ban pynsuk ia ki samla ban ioh kam ioh jam bad ban ioh jingmyntoi ha ki kam ki jam ba ki seng.

Na ka liang u President HANM Lamphrang Kharbani ula ong ba kim nym shong kli kti bad kin leit ban dawa na ka sorkar jylla ba dei ban pynioh ïaka hok ki tri ri trai muluk bad ban shna ki aiñ ba iadei bad ka miat ka bha ki samla bala nang bala stad.