Duna ki kynhun ba shim jingiarap na ka Piggery Mission bad Milk Mission ha West Jaintia Hills

Syllad | The Rising MeghalayaJuly 7, 2021

U Director AH & Veterinary Meghalaya Shillong, Dr KB Sahkhar ula ong ba ka West Jaintia Hills ka dei ka sahdien bha ka jingdon jong ki briew ban ri jingri jingdup kaba kynthup iaki masi bad ki sniang.

“Watla ka sorkar kala sdang iaka Piggery Mission na bynta ban kyntiew iaka kam ri sniang, hynrei ka West Jaintia kan dang duna bha ki kynhun ne society ban mih shakhmat ban shim kabu iaki lad jingiarap jong ka sorkar,” la ong u Dr. Sahkhar haba kren kum u kongsan haka jingrakhe iaka World Zoonosis Day ne ka sngi kyrpang ban rakhe iaka jingiakhun pyrshah iaki jingpang ba iabit na ki mrad sha ki briew ha ophis jong ka u District Animal Husbandry & Veterinary Officer, West Jaintia Hills haka sngi ba Ar.

Ka mat pdeng jong ka World Zoonosis mynta ka kynti kadei “Let’s break the chain of Zoonosis transmission disease” ne ban pyndkut ia u kynjri jingpur ka jingpang na ki mrad sha ki briew. La rakhe iaka 6 tarik Naitung kum ka Zoonosis Day ka long kum shibynta ban kynmaw burom ia u synñiang u bynhei bala noh da u Louis Pasture uba dei u scientist uba la lap nyngkong ïaka dawai tika ban ïada naka jingpang lamwir jong ki ksew (Rabies) haka 6 tarik Naitung jong u snem 1885.

Shuh shuh u Dr. Sahkhar ula ong ba hadien bala sdang iaka Piggery Mission ka Jylla ki dak ki shin kila paw ba ki nongri sniang kila sdang ban sngewthuh iaka jingiohnong naka kam ri sniang bad mynta ka jingpynmih sniang kala kynjoh sha ka 7 lak tam bad ha u snem 2030 ka jylla ka kyrmen ba kan lah ban pyndap iaka jindonkam sniang kaba bun na ki nongshong shnong ki bang bha ban bam iaka dohsniang.

U Dr Sahkhar, ula ong haba phai ka kam ri masi ruh ka West Jaintia Hills District ka dang sahdien bha kynthup iaka jinglah ban mih pynmih dud. Haduh mynta ka West Jaintia Hills katkum ka jingkhein ki nongpynmih dud ki dang lah ban pynmih tang 25 gram marwei haka shisngi, katba haka jylla kalong 85 gram.

U Dr. Sahkhar ula kyntu ia ki kynhun ne society ban shimkabu iaka skhim sorkar ban weng iaka kyrduh kam kyrduh jam bad ban kyntiew iaka ioh kot jong ki nongri jingri.

Ha kane ka jingrakhe ia kane ka sngi la pyniaid iaka jingialang da u Dr. DI Kjam District AH & Veterinary Officer, West Jaintia Hills. Nalor u Dr KB Sahkhar la iadonlang ka Joint Director ka Dr A Laloo bad ki katto katne ngut ki nongri jingri ka West Jaintia.

U Dr Kjam ula ai nuksa iaki jingpang  kiba ïabit na ki mrad sha ki briew kiba kynthup iaka jingpang lamwir (rabies) haki ksew, ka jingpang haki sim/syiar (Bird flu), ka jingpang khlam haki sniang (Swine flu, ka jingpang TB ne tuberculosis ha kaba bun ki briew ki la ïoh ïaka jingpang TB na kadaw ba ki ïabit na ka masi ba ki ri.

U Dr. H Niang AH & Veterinary Officer V/U Jowai ula ïathuh ba ka Chaff Cutter kadei ka kor kaba ïarap ymtang ïaki nongri jingri ban ot ïa u phlang ban ai bam ïaki jingri jingdup jong ki, hynrei ka ïarap ruh ban ot pyn-ni ïa u skum kba na ka bynta ki nongrep tit.

Ula ïathuh ba ïa kane ka kor ot phlang la ïoh jingïarap lyngba ka Central Scheme bad ka dor jong ka, ka long T. 11, 500/- kawei katba ki nongïoh jingmyntoi kin siew tang 1500 tyngka kawei.

Ha kane ka sngi la sam ruh ia kine ki kor 19 tylli sha ki nongri jingri ka district.

La ioh ruh iaka jinghikai bniah na ka Dr E Passah halor ka Zoonosis Disease ne ki jingpang ba iabit naki mrad sha ki briew.