Duna marbam ki dukan ha Jowai, shimkhia ka bor synshar district ban pynbeit

Syllad | The Rising MeghalayaMarch 30, 2020

Ka bor synshar district jong ka West Jaiñtia Hills District kala lum jingïalang ïaki nongdie marbam mardih ba kynthup ïaki nongdie wholesaler bad ki retailer jong ka nongbah Jowai, ka nongbah jong ka West Jaiñtia Hills District ban shim jingkhein ïaka jingdon ka marbam mardih ha Jowai.

Ha kane ka jingïalang ïa donlang u MLA jong ka Jowai, u Ma Wailadmiki Shylla, u Deputy Commissioner West Jaiñtia Hills District u ma Garod LSN Dykes, u Superintendent of Police Bah Lakador Syiem MPS, u ma Lyngkor Kynjing MCS bad ki nongdie mar ba pawkhmat ka sor Jowai.

Ïa kane ka jingialang la pynlong hadien ka jingialang jong ki MLA ka Rilum Jaiñtia bad ki DC jong ki artylli ki district, ka East bad ka West Jaiñtia Hills District haka sngi Saitjaiñ kiba wan shim jingkhein ïaka jingpynkhreh ka Jaiñtia ïaka jingiakhun kyrduh bam bad u khniang coronavirus.

U DC bad MLA jong ka Jowai kila ong ba kam don ka jingduna marbam mardih, hynrei ka donkam ba ki nongdie dukan ki dei ban ai jingtip ba thikna bad kaba shai ha kano ka dukan ba kin leit ban shim mar na Shillong khnang ba kin ïoh ban pyntip mar kylliang hapdeng para DC ban pynsuk ïaka leit ka wan ki nongdie mar bam ka Jowai.

“”Baroh ki kali kit mar bam mar dih ym don ba khang iaki ban leit kit mar, hynrei tang ka jingpyntip kaba ki nongdie dukan ki dei ban ai sha ka bor district khnang ki DC arliang kin ia tip iaka leit ka wan ki kali kit mar,” ong u MLA ka Jowai ma Wailadmiki Shylla bad banjur iaki paidbah kim dei ban her syrngiew namar ka bor District bad ka Sorkar Jylla kala shimkhia ban pynbeit iaka rukom iaid ki kali kit mar ha kum kane ka por ka jingkhang khyrdep ha ka ri baroh ban iakhun ia u COVID-19.

Baroh ki nongdie mar naduh ki wholesaler haduh ki retailer kila pynpaw ba kila duna bha ka stock hadien ka jingkhang khyrdep namar ba kin ioh ka lad ban leit kit mar bad kila kyrpad ïaka bor synshar district ban ailad ïaki ban leit kit ïaka amr na Shillong bad kiwei kiwei ki jaka ha East Khasi Hills District.

U MLA bad u DC kumjuh u SP kular ban shimkhia ban pynbeit îa ka jingleit jingwan ki kali jong kine nongdie wholesaler bad retailer ym tang hapoh district bad ka Jylla, hynrei wat ki kali kiba wan na Assam.

Kane ka juh ka jingialang kan sa long biang ong u MLA k Jowai ban shim jingkhein bad ban pynbiang ïaka jingdonkam jong ki nongshong shnong.

La kyrpad ïaki nongdie mar ba kim bit ban shimkabu haka dor ka mur, hynrei ban ai ka jingiatreilang bad ka sorkar ban jop ka jingiakhun ban tem ïaka jingpur u khniang COVID-19 ha baroh kawei ka Jylla bad ka ri hi baroh kawei.

Kane ka jingkhang khyrdep ban ïakhun ïaka jingpur u khniang Coronavirus ha baroh kawei ka ri kala ktah ia baroh khamtam ïakiba bam na kti ha ktien bad kiba duk kiba kyrduh.

U nongrep ruh ha kylleng ki shnong ula shah ktah bha nalor ba kadei ka por tlang ba duna ka jingpynmih jhur.