Duna marbam sha ki shnong nongkyndong ong ka FKJGP

Syllad | The Rising MeghalayaApril 7, 2020

Ka Federation of Khasi Jaintia and Garo People (FKJGP), Jaintia Hills District Unit kala kyrpad iaka sorkar ban pynbiang iaki mar bam mar dih sha man la ki shnong ki thaw namar kumba long mynta bun ki shnong sha nyngkyndong khamtam kim ioh iaki mar bam haki shnong jong ki kaba la wanrah ia shibun ki jingeh.

U organising secretary FKJGP u Damian S War, ula ong hadien ba ka sorkar ka la pynbna iaka lockdown ne ban khang khyrdep ïa baroh kawei ka ri khnang ba u nongshong shnong un shong ha iing ban ïakhun pyrshah iaka jingpur u khnniang COVID-19, bun ki shnong ha rilum Jaintia kila treilang bad ka sorkar, hynrei ka jiingeh pat ka long ba duna ki mar bam bad ki dukan dukdoh ruh kim don shuh ki mar bam ban die sha u paidbah.

U Tuesday Lytep President FKJGP ula ong ba nakaliang jong ki kum ki nongialam kila wan ïakynduh ïa u Deputy Commissioner West Jaiñtia Hills ban pyntip ïa u halor ka jingduna marbam sha ki shnong nongkyndong bad kila kyrpad ia u ban shimkhia ban pynbiang ia ki mar bam ha baroh ki shnong bad la kyntu ruh ïaki waheh  shnong shimkhia ban peit iaka jingeh ki nongshong shnong khnang ba kan nym don ka jingkyrduh bam ki paidbah ha manla ki shnong.