Durand Cup: Niom u paidbah ban thied ticket, yn pyni screen ha Jowai bad Khliehriat

Syllad | The Rising MeghalayaAugust 24, 2024

Ka jingiaknieh ticket jong ki paidbah ka long kaba jur bha na ka bynta ban ioh peitkai iaka ka jingiakhun semifinal kaba nyngkong jong ka lympung ialehkai football Durand Cup hapdeng ka Shillong Lajong FC bad ka North East United ka ban long ha JN Stadium haka 26 tarik une u bnai Nailar.

La sakhi ba ki paidbah kila ia niom ha Golflink, Shillong ban ioh thied iaki ticket, hynrei bun kila bynniaw bym ioh ticket.

Ki dkhot shnong jong ka Golflink ruh kala mih shakhmat ban tem iaka jinghuri hura jong ki paidbah haka por mynstep.

Shuh shuh na kaliang ka Directorate of Sports and Youth Affairs, Meghalaya kala pynkhreh ban buh LED screen ha kylleng ki jaka ha sor Shillong.

Ha Jowai, ka Directorate of Sports and Youth Affairs,bad ka ophis u Deputy Commissioner, West Jaintia Hills District ryngkat ka jingiatreilang ka Ladthalaboh Dorbar Shnong Jowai kin buh iaka LED screen ha madan Daimasi.

Ha Khliehriat ka ophis District Public Relations Officer, East Jaintia Hills kan buh iaka LED Screen ha phyllaw jong ka DC’s Office, Khliehriat.