E mynsien ka President Droupadi Murmu ya ki SHGs wa ki bru wa rep ka Jylla

Syllad | The Rising MeghalayaJanuary 17, 2024

Ka President iong ka Ri India Droupadi Murmu ynne ka 16tarik Duiatra da yachem ko ya ki SHGs, ki bru wa rep ka Jylla ha Baljek Jengjal, West Garo Hills hei emlang u Phagu Chauhan, Lat ka Jylla, u Chief Minister ka Jylla Conrad K.Sangma, Power Minister ka Sorkar A.T.Mondal wa u Education Minister Rakkam A. Sangma.

Hei klam ka Droupadi Murmu da yaroh ko ya ka Sorkar kawa da chimkhia u thuh ki lad ki luti hei wow kyntu kynrong ya ki SHGs wa em hapoh ka Jylla. Kyruin ha ki por nachwa niar u ioo u chem wa ki kynthai em bynta ki ha ki kam chnong kam thaw nae ki kam imlang sahlang tangwa katni ki sngi sniawsarong u ioo wa ki kynthai  dalai ki chakhmat ha waroh ki liang.

Chooh chooh ong ko i pynkup bor ya ki kynthai nadooh ki kam imlang sahlang, I khih I kreh, ki kam sain hima sima wa ha kiwi kiwi ki bynta pynsabut ki hakhmat ka pyrthai wa kat ha u snem 2047 ka ri India u man ko kawi na ki ri wa kap walai chakhmat khamtam heiyatoh wei kam ki manbei nae ki kynthai kiwi ki ri ka pyrthai chat ki khmat ki u peit cha ka Ri India.

Khana ko leh wa ka sorkar katni yaleh ko u chna u pynmih ki rukom yarap wapher neibynta I myntoi ki Sein kynthai nae ki SHGs tangwa ha lyndet I pyrchang iongka wow poi cha ka thong ka luti dang man kawa jngai wei kawa jwat, han la kattae leh kyrmen yooluti ko wa dei yakrehlang chisien ka sngi daw poi cha ka thong kam wa damut damang.

Neiliang u Governor Phagu Chauhan da yaroh u yei wan yuhkjat ka President Droupadi Murmu hapoh ka Jylla wei da ong u leh man ko ka bru wa e mynsien ya ki kynthai kamjooh ki manbei iong ka ri India wei kyrpang ya ki kynthai ki jaitbru khianpaid.

U Conrad K.Sangma, Chief Minister ka Jylla hei klam iong-o ha kani ka yalang da pynsniaw  u wa ka Meghalya toh ka Jylla kawa ki bru e jait ki cha ka kynthai wei ki kynthai ioh ki I bhah I bynta wa kyrpang  hawa nujor wa u chynrang han la kattae leh dei yakrehlang chirrup wa u chynrang man ko ka Jylla ka kawa lai cha khmat.

Chooh chooh da khana pysniaw u leh hakhmat ka President ya ki lad ki luti wapher kiwa ka sorkar mang kyrpang ko ya ki SHGs wa ya ki kynthai kiwa kynthup yei e bhah e bynta ya ki wow man dkhot hapoh ki VECs, u kyntu kynrong yei khih I khan iongki lyngba ka National Rural Livelihood Mission wa kiwi kiwi.

Ka President ha kani ka jooh ka sngi da wai ko iaka Rural Tourism Accommodation ha Khongtong , Mawlyngot wa ka chnong Kudengrim haka yalang kawa man ha Mawphlang. Da wai paidbah ko iaka Shillong Peak Ropeway wa ar tylli ki surok ka Rongjeng Mangsang Adokgre Road wa ka Mairang Ranigodown Azra Road.