E yarap ka NESFAS wa ka GHE da ki Solar Plant wa ki tiar cha ki 4 tylli ki PHC

Syllad | The Rising MeghalayaJanuary 17, 2024

Ka NESFAS dei yakrehlang ka Global Himaliyan Expedition (GHE) chirrup I kyrchan  ka TATA Communication Ltd, ha ka 16 tarik Duiatra da e yarap ki da ki Solar Plant wa ki tiar cha ki 4 tylli ki PHC wa em ha East Khasi Hills District.

Kini ki soo tylli ki yung thaw e sumar nae PHC kiwa daioh ya kini ki tiar toh ka Jongksha PHC, Mawkynrew PHC, Jatah PHC wa hap hapoh ka Mawkynrew Block katwa ka Wahsherkhmut PHC wa hap hapoh ka Pynursla Block.

Ya kani ka yalang da pynman hei sakhilang u Waheh Chnong ka Jongksha ma Olet Kharsahnoh kam u kongsan hei emlang ki dkhot ka NESFAS chirrup ki staff na ki soo tylli ki PHC.

Ki tiar kiwa da e yarap cha ki 4 tylli ki PHC kythup ya ki Solar Panel 7.5 kilo watts uwi katwa kiwi wan ki tiar kiwa yatoh wei emkam iong ki PHC kynthup ki Vaccine Carrier, suction pumps, delivery beds, OT Lights, IV Stands etc. wei neibynta wow pynchong pynthiah ya kini ki tiar da em hadooh 4 ngut ki Engineer heiwa uwi toh u iong ka GHE katwa 3 ngut wan toh kiwa na South Garo Hills.

Ka Dr. Lyndem, AYUSH Doctor Jongksha PHC ha ka yalang da e ko ki kyntien pdiang burom katwa u Pius Ranee, Executive Director NESFAS da klam u hajrong I emkam wow pynneh pynsah yei man ka Bei Rymaw neitae da khanna u leh chaphang ka ‘Climate resilient Village Programme’ kawa da yarap poisa na ka Tata Communication Limited deilang ka GHE ha ka thong iong ka Sustainable Development Goals.

Chooh chooh u Pius Ranee da khana leh wa lyngba kani ka prokram da ye u e yarap da ki Solar Electrification cha ki 550 tylli ki manyung, 11000 cookstoves wei hadooh katni da ye u e yarap kamwa 12 tylli ki PHCs kawa ye u e kyrchan 24×7 power backup.

Neiliang ka NESFAS da klam da u Khrawborlang Wahlang, Adviser uwa da e I sniawngooh wakhroo ya ka Tata Communication wa ya ka GHE  kiwa da yarap hei wow pynman yeini I thmu ka sein iwa jop.

Kiwi kiwa da klam ha kani ka sngi toh u Dr. R.Singh, Medical Officer Jatah PHC, Dr. Mawlong, Medical Officer Mawkynrew PHC, Dr. Nogbri, Medical Officer Jongksha PHC wan a u Shaiphar Dohling, Community Consultant NESFAS.