Ekti ya ki Electoral Rolls wa pura cha ki yahkhmat iong ki sain hima sima, ka Nartiang kawa boon vote

Syllad | The Rising MeghalayaJanuary 5, 2024

Ynne ka sngi Khyllaw 5 tarik Duiatra 2024, u B.S.Sohliya, IAS  District Election Officer, West Jaintia Hills ha ka yalang wa man ha Conference Hall D.C Office hei emlang ka B Blah, Additional Deputy Commissioner (Election), ka DV Lyngdoh, ADC-West Jaintia Hills wa ka HML Kynta, ADC-West Jaintia Hills da ekti u ya ki Electoral Rolls iong ki Soo tylli ki Constituency wa hap ha West Jaintia Hills kiwa kynhup ya ka 1-Nartiang (ST), 2-Jowai (ST), 3-Raliang (ST) wa ka 4-Mowkaiaw (ST).

Ya kini ki Electoral Rolls da pyntoh pyntne kat kam ka Registration of Electors Rules 1960 iong ka 01-01-2024 wei ya kini ye leh wow ioh u peit u ioo ha Yung krehkam iong U Deputy Commissioner (Election Branch) hapyrdi ki kynta wa man kreh kamjooh leh ha kiwi ki thaw wa da jied kyrpang  wa em ha ki Polling Station wapher.

Neiliang ka B Blah, Additional Deputy Commissioner (Election) hei klam iong ka chaphang ka EVMs da kyrsu kyntu ko ia ki paidbah kiwa kwah u tip nae u ioo yei rukom leh ya ki EVMs wa ki VVPAT ye ki u wan ha ophis krehkam iongka Election hapoh ki kynta wan man kreh heiwa em ki bru ki wow batai pynioo ha ki chaphang kammon u tip u leh ya kini ki machine (EVMs & VVPAT).

Kat kam kani ka Electoral Rolls da khana wa Ki paidbah wa em ha ki Constituency wapher kiwa ioh yei hok wow jied ya ki Nongmihkhmat man ki kamni, ha 1-Nartiang  (ST) em ki hadooh 45,375 kynthup 22,328 ki chynrang wa 23,047 ki kynthai, ha 2-Jowai (ST) ki nongthap Vote em ki hadooh 41,345 heiwa 19,454 toh ki chynrang katwa 21,881 ki kynthai, ha 3-Raliang (ST) ki nongthap Vote em ki kamwa 40,019 ngut heiwa 19,001 ki chynrang wa 21,018 ki kynthai katwa ha 4-Mowkaiaw (ST) wan ki nongthap Vote waroh em ki 39,669 ngut kynthup 19,624 ki chynrang wa 20,045 ki kynthai.

Ki Polling Station waroh ki wow em ha ki Constituency wapher kat kam kani ka Electoral Rolls da ong wa ha 1-Nartiang (ST) u em 63 tylli neitae ha 2-Jowai (ST) 57 tylli katwa ha 3-Raliang (ST) wa ha 4-Mowakaiaw (ST) u em ki mar 55 tylli ki Polling Station.